Gobiernonan ta hunga yoyo cu ministerionan y stroba gobernacion. A pesar di e conseho di e organo Raad van Advies, por mira cu un biaha mas un gobierno ta haci caso omiso di esaki ta haci wega di yoyo cu e ministerionan.
Na diferente ocasion, of miho bisa cada biaha cu cambia e departamentonan bou di cual ministerio nan ta cay of cual ministerionan ta bay hunto, Raad van Advies ta expresa su preocupacion. EL a bira un trend caba cu cada gobierno cu sinta, ta hunga un wega di yoyo cu e ministerionan, cu no ta na bienestar di e pais, paso cada uno tin un kier y e pueblo y maneho general di departamentonan ta wordo perhudica.
N’e momentonan aki no por kita di e percepcion cu durante e negociacion pa logra forma Gabinete Mike Eman III, pasobra hasta den esaki a torno pa yame Gabinete AVP-FUTURO, a torno na tur cos y esaki tabata solamente pa complace e capricho y ambicionnan politico di un solo persona Gerlien Croes.
Con por ta posibel cu Ministerio di Relacion di Reino no ta cay bo di e Prome Minister, kende ta e mandatario responsabel pa Asuntonan General di e pais y por lo tanto e Relacion cu Reino tambe. A torno na e fundeshi di gobernacion p’e malamucha Gerlien Croes. Un mucha cu su kier ta bini na prome luga en bes di su pais. Den henter e negociacion pa formacion di gobierno, e lider di FUTURO a demostra cu e no tin amor pa su pais, pa sirbi Aruba sino un amor pa poder.
Fanaticonan ta bisa cu ta trata di cambionan chikito,esaki no ta cuadra cu berdad, tras di e cambionan aki tin hopi problema. E Landsverordening Instelling Ministeries mester tabata cla caba asina cu e gobierno nobo a huramenta pa entrega na Parlamento. Awo e no a bay ni Raad van Advies ainda, aunke por ta sigur cu e instancia aki lo no ta contento si mira tur e consehonan cu nan a duna den pasado.
E cambionan aki ta stroba e maneho, pasobra hopi biaha tanten cu e LIM no ta cla, tin minister cu tin un ministerio bou di dje y e mes no por firma. E ta depende di su colega pa firma tur documento oficial. Y un minister awendia mester para responsabel pa su actonan y no por firma sin mas algo pa un colega. Asina henter e aparato y departamento ta stanca si nan no coopera cu oro. Un bol di hilo completamente bruha.
Den pasado Raad van Advies a bisa cu den transcurso di añanan a surgi e practica cu cada gobierno nobo ta encera cambio di LIM. Pues cada cuater aña tin un reparticion diferente y tereno di maneho ta cambia, y e departamento- y fundacionnan cu ta resorta bou di nan tambe. Y ta crea ministerionan nobo. Desde cambio di siglo, por lo menos un “beleidsterrein” ta move bou di cada cambio di gobierno pa un otro formacion di ministerio sin cu esaki ta bon hustifica. Y esaki ta algo cu RvA a bin ta cuestiona cada bes. Nan preocupacion ta pasobra e practica aki no ta garantisa unidad, continuidad y consistencia di maneho suficientemente.
Pero si wak e formulacion di e diferente ministerionan, tin un caminda cu a faya durante negociacion pa formacion di e gobierno nobo. Constitucion di Aruba ta papia bon cla di cierto “Beleidsterreinen” pa cual gobierno mester tin un tarea special y esakinan ta: Enseñansa (Gerlien Cries); Creacion di suficiente cupo di trabou (Wendrick Cicilia); Promove bon Salud Publico (Mervin Wyatt Ras) y suficiente Vivienda. Y hustamente e ultimo aki, si mira e ilustracionnan cu ta compaña e articulo no ta aparece ningun caminda. Ta parce cu e no tabata di suficiente peso pa mencion’e den un di e ministerionan. Apesar cu Constitucion di Aruba ta papia specificamente di esaki.
Den pasado tambe a cuestiona con manehonan cu ta pertenece hunto ta wordo separa manera, Naturalesa, Ruimtelijke Ontwikkeling y Infrastructura. Den e actual a mira con a crea dos tipo di transporte. Uno ta cay bou di Minister Dowers y otro ta cay bou di Cicilia.
Conclusion ta cu si mira e reparticion ta cu nunca antes a mira ministerionan asina bruha, y probablemente bou di presion pa forma un gobierno, a bay di acuerdo cu esaki pa capricho di e supuesto yabi Gerlien Croes .
