OM: Caso Tulipan

Ministerio Publico a exigi awe den e caso penal ‘Tulipan’ un castigo incondicional di prison di 2 aña
contra e sospechoso G.F.B., ex-ministerio plenipotenciario di Arubahuis na Hulanda.
B. ta wordo acusa di a comete malversacion di fondonan publico y abuso di su funcion durante e periodo
di 2017-2022 na Arubahuis.
Adicionalmente, Ministerio Publico a presenta un demanda di decomiso (ontnemingsvordering) contra
B. pa un suma di casi Afl. 200.000.
Contra co-sospechoso G.Y.L., ex-director interino di Arubahuis, Ministerio Publico a exigi un castigo di
prison di 12 luna di cual 6 luna ta condicional cu un tempo di prueba di 3 aña.
L. tambe ta wordo acusa di a participa den malversacion di fondonan publico y abuso di su funcion
durante e mes periodo cu B.
E tabata responsabel pa finansas di Arubahuis, pero a keda sin interveni, apesar cu e tabata wak cu
iregularidadnan tabata tuma lugar.
For di e investigacion no a resulta cu L. mes lo a gosa di ventahanan financiero.
Pa e motibo ey, Ministerio Publico no a presenta ningun demanda di decomiso contra dje.
E investigacion ‘Tulipan’, cu a cuminza na 2023, ta dirigi riba malversacion di fondonan publico di Pais
Aruba na Arubahuis, cu a wordo usa pa metanan personal di B. tempo e tabata minister
plenipotenciario.
B. lo a usa e fondonan publico aki pa (entre otro) renovacion y ameublamento di un cas di huur na
Hulanda, pa pagonan di recibonan di Setar, pa servicionan di Setar na adres di tata di B. y pa cantidad di
comemento na restaurantnan na Hulanda y Aruba.
Ministerio Publico ta considera e actonan di e sospechosonan B. y L. hopi grave.
Ora un minister abusa di placa di belasting di Pais Aruba pa enrikece su mes y un director keda keto, e
cultura di impunidad ta crece y e confiansa di ciudadanonan den gobierno ta bin abao.
Huez lo dicta sentencia riba 13 di juni venidero, incluyendo e ontnemingsvordering contra e ex-minister.