Aliansa Parlamentario pa Accion Climatico y Transicion husto a keda oficialisa na Panama
Ayera riba Dia Mundial di Medio Ambiente, a culmina un dialogo internacional interesante y importante na sede di Parlamento Latinoamericano y Caribeño (PARLATINO) na ciudad di Panama. Durante e dialogo titula “Los Parlamentos en la Acción Climática y la Transición Justa”, parlamentario di Africa, America Latina y Caribe, Asia y Europa a uni forsa pa forma oficialmente e ‘Alianza Parlamentaria para la Acción Climática y la Transición Justa’ (APACTJ).
E aliansa aki a nace como un respuesta global na un realidad urgente: e crisis climatico no ta un asunto di futuro, sino di awor. Aruba ta den riesgo real y inmediato. Aunke nos isla ta contribui tiki na e problema global di emision di gas cu ta causa cambio climatico, e impacto riba nos ta grandi y desproporcional. Nos ta confronta consecuencianan manera:
Subida di nivel di lama, cu ta un menasa pa nos beach, hotel y barionan cerca di costa;
Erosion di tera y salinisacion di awa di mondi;
Aumento di temperaturanan cu ta afecta turismo, agricultura y nos salud;
Tormenta tropical mas frecuente y fuerte, cu por pone bida di nos hendenan y nos infrastructura na peliger.
Como pais chikito e parti cu mester haya un transicion energetico husto ta hopi importante unda como paisnan chikito y vulnerabel nos mester percura pa nos no wordo laga atras. E accionnan mester ta solidario, sostenibel y inclusivo. Ta un echo cu Aruba mester sigui inverti den energia limpi, educacion ambiental, pero ta hopi importante pa nos cuminsa prepara pa e impactonan y haci e adaptacionnan necesario pa proteha nos isla y nos hendenan.
E aliansa ta sirbi como un plataforma global pa cooperacion interparlamentario, cu meta pa:
Fortalece legislacion pa enfrenta emergencia climatico;
Promove trabou berde y finansacion husto pa adaptacion;
Defende derechonan di comunidad vulnerabel, inclusivo pueblo chikito y insular;
Y sostene un desaroyo basa riba husticia social y sostenibilidad.
Pa finalisa mi tin cu bisa cu como pais nos no por warda pa e crisis sigui bira mas grandi. Nos tin un responsabilidad como parlamentario y gobierno pa sigui hiba e dialogo y mas cu tur cos cuminsa tuma accionnan concreto pa percura cu nos ta prepara debidamente of mas cu por pa e consecuencianan di e cambio climatico.
