Diaranson mainta, Minister di Husticia mr. drs. Arthur Dowers a haci un bishita di sorpresa na Post Oscar, cu ta e Kazerne di Brandweer situa na Aeropuerto Internacional Reina Beatrix.
Minister Dowers a topa cu e personal di brandweer cu a dune un recorido improvisa rond di e facilidad y a splica e mandatario di husticia di tur e retonan cu nan tin desde algun aña atras.
Tin un falta enorme di material pa e personal por bay den accion di manera efectivo y sigur, manera brandweerpak nobo, mirando cu e personal tin cu recicla esakinan apesar cu nan a surpasa nan uzo maximo. Post Oscar ta cumpli minimal cu e ekiponan manera e Aircraft Rescue and Fire Fighting trucks miho conoci como “crashtrucks” pa por sirbi aeropuerto, pero tin un necesidad enorme pa por yega e nivel sigun normanan internacional.
Minister Dowers ta consciente cu tin un plan pendiente pa expande y renoba e facilidad na aeropuerto pero ta lamenta si cu e parti di limpiesa y mantencion di e facilidad existente ta un problema structural cu a surgi durante di e ultimo 7 añanan. Ademas e personal di Post Oscar ta traha den un situacion deplorabel y e ultimo controlnan cu a tuma luga a indica cu e post aki no ta na e nivel cu e mester ta. Prome cu merdia ya caba DOW a tuma accion di limpiesa.
Minister ta satisfecho si cu apesar di e situacion deteriora, e personal ta motiva pa haci tur locual ta den nan alcanse pa cumpli cu nan responsabilidad y trece brandweer bek na e nivel cu e mester ta.
Segun Minister Dowers, “Mester traha mas duro y mester traha mas organisa y mas sistematico”. “Tempo cu a mi a bay como minister, nos a laga diferente tenders cla caba pa e material nobo bin, cual a bin for di desde nos tempo, despues di esey, a drumi riba cierto aspecto, locual no por”, Minister Dowers a expresa.
