Stichting Monumentenzorg Curaçao a kuminsá ku un pilot den kua eksplotashon komersial di patrimonio históriko ta keda realisá via un ‘public tender’ (oferta públiko). Fort Waakzaamheid ta sirbi komo e promé kaso den e método nobo aki, ku ta enfoká riba transparensia, igualdat di oportunidat i uso nobo di nos herensia na un forma sosteníbel.
E fòrti, situá na un punto prominente riba e seru di Otrobanda, tin un terasa amplio ku un bista espektakular riba siudat i laman. E proseso di oferta ta dirigí solamente riba e uzo komersial temporal i reversibel di e terasa, por ehèmpel ku un trùk di kuminda òf algun aktividatnan kultural i pa diberti. E bastion históriko mester keda preservá i ku e mesun imagen; no tin mag di agrega, of tapa nada ku di un of otro forma lo por altera e struktura.
Ku e pilot aki, Stichting Monumentenzorg ke yega na un forma di traha mas habrí i enfoká riba merkado, na un manera ku por garantisá ku e patrimonio ta wòrdu manehá i uza ku kuido.
“Nos ke dirigí nos mes riba un proseso transparente ku ta habri pa tantu empresarionan establesé komo esnan nobo, ku un enfoke spesial riba inisiativanan lokal,” segun Stichting Monumentenzorg Curaçao.
E kooperashon entre Stichting Monumentenzorg Curaçao i e empresario ta sentral den e método aki. Monumentenzorg ta tuma kargo pa mantené e monumento mes, i ta tuma medidanan pa hasi e terasa sigur i funshonal, entre otro ku instalashon di un balustrada na rant di e terasa i suministrashon di fasilidatnan básiko manera awa i koriente. E empresario ta responsabel pa e vishon komersial i e instalashonnan temporal di muebles i dekorashon riba e tereno, respetando e balornan di e patrimonio i e kondishonnan ku Monumentenzorg ta eksihí pa su uzo. Esaki ta un modelo di kooperashon den kua preservashon kultural i desaroyo komersial ta kana man den man.
Si e pilot resultá eksitoso, e fundashon ta premira ku e método aki lo por ser apliká tambe na otro lokalidatnan monumental den su portafolio.
Por haña tur detaye tokante e proseso di e ‘public tender’ via e wèpsait di Stichting Monumentenzorg Curaçao:
https://monumentenzorg.cw/properties/fort-waakzaamheid/
Tur hende ku ta interesá ta invitá pa un bishita e lokalidat djárason 27 di ougùstùs, 4:30pm na Fort Waakzaamheid.
