Den kolaborashon ku e parti karibense di Reino, bon gobernashon i un estado di derecho fuerte, finansa públiko saludabel i sostenibel, i resiliensia ekonómiko di e islanan ta sentral. For di e perspektiva aki, nos ta traha pa un futuro kompartí, teniendo na kuenta e sirkunstansianan lokal di tur seis isla. Debí na unda nan ta situá, e islanan por eksperensiá e efektonan di desaroyonan geopolítiko direktamente. Kontinuidat i stabilidat ta primordial den tempu di tenshon geopolítiko. Pa e motibu aki e presupuesto di 2026 ta konstruí riba e akshonnan ku ya a inisiá kaba.
Pa Boneiru, Sint Eustatius, i Saba, e enfoke ta pa mantené i krese prosperidat amplio pa asina e islanan por sigui desaroyá sosialmente, físikamente i di forma ekonómiko. Ta logra esaki, entre otro, pa medio di e tres Dilnan Regional (Regiodeals). Huntu ku e gobièrnunan insular, gabinete ta komprometé su mes na finansa ku ta prepará pa futuro i bon gobernashon. Esaki ta enserá renobá e leinan ku ta regla relashonnan finansiero i atministrativo. Esaki entre otro lo brinda e islanan aki oportunidat pa haña préstamo den futuro, pa asina permití nan pa por ehekutá nan tareanan efektivamente.
Pa sostené e gobièrnunan insular mihó, nos ta fortifiká nan kapasidat di ehekushon. Esaki lo enserá €4 mion adishonal na 2026. E Agènda di Bon Gobernashon pa Hulanda Karibense ta kontribuí na esaki dor di, entre otro, mehorá servisio na habitante, fortifiká institutonan, i atendé violashonnan di integridat. Pa mehorá konekshon, lo ekstendé e supsidio pa e fèri Makana. Mas aleu a pone €10 mion disponibel pa haf di Saba na 2026, ademas di e €30 mion for di 2025. A pone €16 mion disponibel pa mehorashon di e kayanan na Boneiru pa e periodo 2025 pa 2028. Na 2026 lo implementá un aserkamentu integral pa e infrastruktura físiko pa Boneiru, Sint Eustatius i Saba. E tres islanan i e departamentonan konserní lo traha riba agèndanan físiko pa kada isla, teniendo na kuenta e kapasidat di ehekushon i desaroyonan demográfiko.
Den e kolaborashon ku Aruba, Kòrsou, i Sint Maarten, e enfoke ta riba bon gobernashon i fortifikashon di estado di derecho. Esaki ta un pre-rekisito pa un sosiedat seif i stabil, desaroyo ekonómiko positivo, i finansa públiko sostenibel. Hulanda lo sigui sostené e paisnan outónomo pa logra e ophetivo kompartí aki na 2026, ku mas ku €68 mion disponibel pa e propósito aki. Na 2026, ku sosten di e Organisashon di Trabou Temporal, lo sigui traha riba e Paketenan di Pais pa implementashon di reformanan sosioekonómiko. €27.6 mion ta disponibel pa e propósito aki na 2026.
Pa stimulá ekonomia, Hulanda ta lansa e areglo Borgstelling MKB-kredieten pa Aruba, Kòrsou, i Sint Maarten. E areglo aki lo permití kreditornan na Aruba, Kòrsou i Sint Maarten usa e mesun fasilidat na 2026 i 2027 manera kreditornan na Hulanda i Boneiru, Sint Eustatius, i Saba. Hulanda lo sigui brinda sosten finansiero na Sint Maarten durante su rekonstrukshon despues di orkan Irma na 2017, hasiendo uso di e ‘trustfonds’ di Banko Mundial i ku ayudo tékniko.
Un total di €24 mion ta disponibel te ku 2028 pa un fondo rotativo pa proyektonan ku ta kontribuí na oumentá seguridat di kuminda riba tur seis isla. Na 2026 lo implementá e areglo di supsidio pa inisiativanan sosial i e agèndanan di akshon pa tur seis isla den e parti karibense di Reino, komo e siguiente paso di e diskulpanan pa e pasado di sklabitut. Esaki ta suma €23 mion na 2026.