E suceso di siman pasa a laga Aruba babuca: ora un ciudadano expresando su preocupacion di salud publico, e reaccion di minister en cuestion tabata pa bay den un atake personal y no riba e contenido di loke e ciudadano a trece den luz publico. Esaki ta manda un mensahe hopi peligroso mes, na un pais democratico, unda cu e bosnan critico no ta haya oido di gobierno, pero gobierno ta opta pa elimina e mensahero.
Preocupacion di hopi a bin dilanti
Segun Otmar Oduber, sr. Dijkhoff a pone den palabra loke hopi den nos comunidad ta sinti: e pashentnan no ta wordo trata bon; conflicto y tension tur caminda; e hefenan di departamento ta hinca den directiva sin control di checks & balances; mal practica raporta na hospital; negligencia di dokter y cuido medico. “E pregunta cardinal ta: “Loke Dijkhoff a papia, no ta corecto?” En bes di mustra liderazgo serio cu un topico asina alarmamente, Minister Wyatt Ras ta opta pa traha un video pa ataca sr. Dijkhoff personalmente, prohibi su entrada na oficina y a pone stempel cu e ta mara un na un partido politico, cua mi no sa. Pero e cos mas grave di e contenido di e minister ta, cu e no a nenga ningun di e acusacionnan concreto, sino djis ataca e persona cu a vocifera su experiencia y preocupacion”.
Cartel den Salud Publico
No ta prome biaha cu ta tende di e termino cartel den nos instancia- y fundacionnan. E minister concerni a perde un oportunidad pa demostra con ta goberna responsabelmente. Un minister mester para banda di un preocupacion y percura pa investiga mas profundo. Cana y combersa cu e profesionalnan y nos hendenan, kico tur ta sosode na IMSAN, HOH y henter e cadena di salud publico. Segun Otmar: “Despues di papia cu diferente dokter y verpleegster tanto na IMSAN y HOH, ningun no por bisa si tin “corupcion”, pero si nan reconoce cu hopi di e puntonan y conflikto “di cartel” señalá pa sr. Dijkhoff ta e realidad di tur dia”. Esaki ta alimenta un deficit di confiansa: hopi famia ta gasta extra pa busca conseho medico den exterior, paso nan confiansa den nos propio sistema no ta solido.
Ironia di e gobierno aki
E ironia di mas pio ta, cu e mesun gobierno y minister aki, cu a label un ciudadano manera “politisa” tin varios coordinador sinta den diferente directiva, net unda nan mester percura pa e control y supervision ta mas fuerte. En bes minister percura pa tin mihor control di y drecha checks & balances, e gesto publico cu el a haci, ta netamente reinforsa e sentimento cu si bo papia y duna bo opinion cu no ta na agrado di e gobierno aki, ta busca un manera pa silencia bo.
Kico PPA ta sugeri awor?
Segun Otmar Oduber, e suceso di sr. Dijkhoff ta pone fraccion PPA bira mas critico ainda, specialmente despues di e comportacion di e minister. PPA ta sugeri pa bin cu un encuesta independiente riba maneho, keho y practicanan den salud publico. Restaura e mecanismo di checks & balances, unda ta defini e rol di directiva, evita nombracion politico den posicion tecnico y incorpora un audit clinico. Protega e denunciante pa salvaguardia tur hende, specialmente nos profesionalnan.
Finalmente e caso di sr. Dijkhoff no ta tocante un persona, sino con nos democracia ta trata e berdad. Ora un minister scoge pa ataca e mensahero, el a manda un señal cla: mester keda den silencio riba e echonan. Aruba mester haci exactamente loke un pais adulto ta haci: scucha, investiga y coregi. PPA ta boga pa nos pashent prome, restaura checks & balances, protega e denunciantenan, y exigi transparencia. PPA lo yama e minister pa duna contesta riba dato, no riba e persona y su accion. Si nos kier bolbe gana confiansa, nos mester actua corecto.