Na ocasion di Dia Mundial di Maestro, parlamentario di AVP Otami Thomasia a expresa su felicidad cu e anuncio reciente cu pa 2026 lo implementa un cambio estructural den salario di nos educadornan. Segun e parlamentario, esaki ta un logro cu educadornan a warda hopi decada y cu a cay den bon tera pa e futuro di enseñansa na Aruba.
Thomasia a mustra cu hopi biaha e campo di enseñansa a pidi atencion y un oido serio, y finalmente e momento a yega pa reconoce e esfuerzonan di nos maestro y maestranan. “Coincidentalmente, riba 5 di october – Dia Mundial di Maestro – Aruba por conta cu un regalo di esperanza: un rumbo positivo unda nos maestronan por sinti mas trankil,” e ta enfatisa.
Den su declaracion, e parlamentario a pone atencion riba e realidad dificil cu hopi educador ta enfrenta durante añanan: hopi biaha forsa pa busca un segundo trabou, manera duna bijles of otro tipo di labor, simplemente pa logra cubri gasto basico. Segun Thomasia, esaki no ta e situacion cu nos kier pa un sistema di enseñansa fuerte.
“Nos kier cu nos maestronan por dedica nan energia y enfoke exclusivamente na guia y formacion di nos hobennan. Nan mester sinti siguridad y stabilidad, sin preocupacion constante riba fin di luna,” el a agrega.
“Esaki ta un logro historico den enseñansa y mi ta duna pabien di curazon na un y tur educador cu tur dia ta lanta trempan pa forma e proximo generacion. Aruba ta depende riba un generacion nobo di hobennan prepara pa carga pais hiba dilanti. E decision pa ahusta salario di educadornan ta mustra cu nos ta bayendo den un caminda bon y cu nos ta pone balor unda e ta realmente necesario: den e base di nos futuro.” – Otami Thomasia, Parlamentario di AVP.
Thomasia a reconoce tambe cu tur departamento den area di enseñansa tin su propio reto, for di EPI y EPB te na Colegio y MAVOnan. El a expresa su confianza cu e gobernacion lo sigui bishita, scucha y atende tur nivel educativo pa implementa e cambio estructural den su totalidad.
Concluyendo, e parlamentario a ripiti cu e anuncio di ahuste salarial ta un señal positivo cu Aruba ta pone atencion unda e ta mas necesario: na educacion, na nos maestronan, y den e base di un futuro prospero pa nos pueblo.