Decision pa sostene islanan BES
Islanan BES a haya nan mes confronta cu un situacion dificil unda cu Hulanda a dicidi di inicia un proceso di cambio den e leynan cu ta regula e manera di goberna y e finansas di e islanan sin consulta cu nan y involucranan debidamente. Esaki mas cu claro tawata un punto di agenda hopi importante den nos reunion di tripartiet (reunion cu parlamento di Aruba, Corsou y Sint Maarten) aya na Hulanda.
E tres parlamentonan a dicidi pa preto riba blanco expresa nos sosten moral y institucional na e islanan BES y nos a denuncia e manera unilateral cu Hulanda a inicia e proceso di cambio sin consulta cu e islanan, contra e obligacon cu ta stipula den Articulo 209 di WolBes. Nos a enfatisa cu segun e Statuut di Reino Hulandes, e derecho di autodeterminacion di e islanan BES no por wordo viola ni limita. Nos a accentua e hecho cu tur desicion cu tin efecto riba nan autonomia y sistema di gobernacion mester tuma lugar den dialogo y cu respet mutuo. Mi mester bisa cu ya caba como fraccion, dia 15 di september 2025, despues di e bishita di un delegacion di islanan BES na Parlamento di Aruba, nos a brinda nan nos sosten.
Similaridad den situacion cu Aruba
E situacion di islanan BES sigur ta un situacion bastante similar cu loke ta pasando na Aruba pa cu e Consensus Rijkswet HOFA, caminda cu esaki (HOFA) a keda aproba pa gobierno di Aruba sin consulta y haya consensus (bay di acuerdo) di Parlamento di Aruba. Mas duidelijk e no por ta: tanto den caso di islanan BES como den caso di Aruba, nos ta mira un falta di respet pa autonomia y derecho di autodeterminacion y pa nos democracia parlamentario. Ta p’esey mes nos a scoge pa brinda nos sosten na islanan BES por medio di un resolucion (preto riba blanco).
Yamada na colega parlamentarionan di coalicion (AVP/Futuro)
Mirando cu AVP y Futuro a bay di acuerdo cu e resolucion y e situacion ta similar cu aki na Aruba, mi ta spera nan por reflexiona y tuma e decision corecto na bienestar di nos pais. Ainda nos ta na tempo, ban coregi e rumbo incorecto cu nos ta bayendo pa loke ta trata HOFA (procedura/proceso y contenido), no ban entrega nos derecho di autodeterminacion y democracia parlamentario pa un beneficio financiero sin siguransa ni garantia cu no ta solamente e beneficio financiero door di un interes mas abou riba nos debe di covid.
