Den un entrevista cu sr. Raoul White miembro di partido Hulandes Groenlinks/Pvda, a puntre su opinion riba e situacion cu tin cu e Rijkswet. El a bisa cu e ta di opinion cu cada pais autonomo den Reino Hulandes tin nan mesun derecho y esaki ta importante pa mantene.
Analisando e situacion actual caminda cu tabata rekeri consensus cual un partido no a respeta, sr. White ta haya cu Aruba por a atende cu e situacion na un mihor forma.
Sr. White a indica cu e conoce e Rijkswet, pasobra nan a yega di trata esaki den diferente debate. Pesey e ta haye importante pa awor mas cu nunca, traha riba e geschillenregeling, pasobra esey lo ta e plataforma cu por controla y analisa e situacion cu tin aworaki, unda cu tin un posibel lucha pa poder. Consecuentemente lo por tin mas igualdad den procesonan.
A puntra sr. White dicon e ta pensa cu Aruba cu Hulanda ainda no por a yega na otro pa loke ta e geschillenregling. El a splica cu e mandatario encarga anteriormente a haci su maximo esfuerso pa logra esaki, pero cu pa un forma of otro e proceso a tranca di banda di Aruba, segun cu e ta recorda. Consecuentemente tabatin cambio den e constelacion di gobierno Hulandes, cual a haci cu e proceso a bolbe cambia. E Gabinete demisionario cu tin actualmente na Hulanda ta mas critico riba e relacion entre Caribe Hulandes y Hulanda y ta mira e situacion aki completamente diferente cu esun anterior y esey tin consecuencia pa por yega na un acuerdo.
Pa resumi sr. White a bisa cu si Aruba a bay di acuerdo cu e geschillenregeling cu tabatin riba mesa cu e Gabinete anterior, eorey chens ta grandi cu lo por a realisa esaki. Sinembargo e cambionan cu a tuma luga cu e Gabinete Hulandes kisas a presenta net na un mal momento. Esey ta posiblemente e rason cu ainda no por tin un geschillenregeling, pero sigur ta importante pa traha riba esaki mas pronto cu ta posibel.