Parlamentario Dangui Oduber a cuestiona fuertemente e actitud di Minister Gerlien Croes, kende ta riba un tour mediatico purbando di bende y hustifica e Rijkswet HOFA bou di e argumento cu esaki lo trece mas control y transparencia. Segun e parlamentario, ta resulta sumamente ironico cu hustamente e minister cu ta boga pa mas control y transparencia, awe sinta den e stoel di gobernante no kier pa Parlamento controle y no kier ta transparente cu e pueblo.
Oduber a señala cu ya a transcuri 280 dia despues cu Minister Gerlien Croes a haci uzo di un jet priva pa bay celebra na Corsou. Den e 280 dianan aki di silencio, e mandatario no a contesta e preguntanan formula, no a duna cara na pueblo den Parlamento, no a presenta pa un debate, y ta nenga di comparti e prueba di pago cu por a pone fin na e discusion aki.
E parlamentario a señala cu e minister ta actuando comosifuera e ta para riba Parlamento y riba nos leynan. Debi na e falta di contesta y transparencia, e fraccion di MEP a haci uzo di e instrumento di LAR pa exigi pa e mandatario duna cuenta. Sinembargo, Oduber a indica cu e minister a ricibi e conseho di LAR 6 siman pasa caba, pero te cu awe e ta nenga di comparti esaki cu Parlamento. Kico e Minister tin di sconde?
Oduber a remarca cu e minister no ta practicando loke e mes ta predica, ya cu su accionnan ta contradeci e imagen di transparencia cu e kier presenta. El a enfatisa cu no por ta asina cu e mandatario ta exigi pa tur hende duna cuenta, mientras cu e mes ta haci un excepcion pa su propio persona.
El a indica cu sconde informacion y keda sin revela e recibo di pago ni e conseho di LAR ta accionnan cu ta stroba e trabou di CONTROL di Parlamento.
Oduber a finalisa bisando cu un minister manera Gerlien Croes NUNCA por papia di mas control y transparencia ora e mes NO kier control y e mes NO kier duna cuenta na Parlamento. Su mensahe final pa e minister ta: “You can run, but you cannot hide, pasobra tardi of trempan e berdad lo sali na cla!”