Diaranson durante un reunion den comision central a toca e topico preocupante di siguridad di trafico. Parlamentario Eduard Pieters di fraccion di PPA a expresa cu no por trata siguridad publico cu tardansa politico. Aunke e reunion den Comision Central a enfoca riba e iniciativa di ley di Roekeloos Rijden, unda PPA y demas fraccionnan a pidi pa duna un siman adicional pa por studia e iniciativa di ley aki mas profundo y tambe duna Minister Dowers espacio pa por aporta cu conseho, tin un tema cu no por keda sin atencion: e implementacion di body-cam pa polis, un herment esencial pa transparencia, proteccion y confiansa.
Un tema urgente cu ta repetidamente posponi
E discusion riba body-cam no ta nobo. Desde e incidente tragico di e hoben Lanoy, PPA a actua cu urgencia. “Na inicio di maart 2025, fraccion di PPA a yama un reunion di caracter di urgencia y a presenta un mocion cu a haya aprobacion unanimamente den Parlamento, pa garantisa body-cam pa polis. E meta tabata simpel y cla: preveni duda, proteha polis y ciudadano y duna claridad obhetivamente den e situacionnan critico,” Eduard a elabora.
PPA a sigui cu e preguntanan formal na fin di maart na minister Dowers: kico ta e postura di ministerio, cua fondo mester aloca y cua ley(nan) mester adapta? Den e contestacion, minister a indica cu for di e gobierno anterior tabatin 28 body-cam disponibel. “Mes periodo ey, hunto cu e ex parlamentario Otmar Oduber, PPA a reuni cu Korps Chef Arnhem pa haya un splicacion detaya riba con body-cam ta funciona y cua balor e tin den practica policial”.
Proposicion rechasa, oportunidad perdi
Ora a bira cla cu e cantidad di body-cam no tabata suficiente, PPA a presenta un amienda durante tratamento di presupuesto 2025 pa aumenta fondo pa mas body-cam. Tanto fraccion di AVP como FUTURO a rechasa e amienda cu argumento cu e.o. “ya ta den presupuesto y no tin mester”. Segun Pieters: “PPA no a laga e asunto cay. Den luna di augustus, durante tratamento di Najaars Nota pa e presupuesto supletorio 2025, PPA a bolbe presenta un di dos amienda cu un enfoke strategico pa libera mas fondo. Pero un biaha mas e mesun fraccionnan di AVP y FUTURO a rechasa e oportunidad y proposicion, cu tabata na bienestar y interes general di nos comunidad.”
Resultado? Casi un aña despues di e mocion unanimamente aproba, pero ningun implementacion concreto a tuma lugar.
Consecuencia pa comunidad y polis
E frustracion den comunidad ta crece y sigur ta un avalancha di pregunta PPA ta hayando. “Hopi pregunta ta keda sin contesta y confianza ta poni na prueba. Body-cam no ta contra polis; al contrario, ta un proteccion pa polis y ciudadano. Cu body-cam, evaluacion di suceso por ta haci di manera obhetivo, reduci speculacion y fortalece e estado di derecho,” Eduard a vocifera.
Minister Dowers a indica cu pa juli 2025 lo cuminsa un proyecto piloto di body-cam. Nos comunidad no ta wak esaki, pues minister a gaña pueblo. PPA ta considera e proyecto piloto un paso sumamente laat, pero necesario. Sinembargo, promesa sin accion no ta restaura confiansa.
Finalmente Eduard Pieters a bolbe expresa, cu PPA no ta djis critica; PPA a propone solucion concreto, dos biaha y ambos rechasa! Awe, comunidad ta paga e prijs di keda sin actua. Siguridad publico y transparencia no por keda dependiente di calendario politico. Body-cam mester ta implementa cu urgencia, cu presupuesto y cu boluntad. Aruba merece un polis cu tin herment necesario, cu ta proteha y tin e confiansa di un ciudadano y un gobierno cu ta actua, no un cu ta djis priminti den bashi.