DUSHI BONEIRO. DUSHI HENDE.
Mi curason. Mi curason ta papia awe den lenga di amor y gradicimento pa tur nos dushi
hendenan di nos isla ruman Boneiro. Tawata 4 dia impactante y interesante yen di bendicion riba
e dushi isla aki, cu su bunita naturalesa. Rondona pa laman blauw cla scur cu santo blanco dorna
pa e kokolishi y piedranan di mas bunita. Den otro awanan flamingonan ros para of ta move
suave den tur nan elegancia. Nos a drenta den casitanan chikito historico di esclavo di temponan
atras, color blanco y color geel. Nos a piki klompi salo na e salinja di salo den awanan color ros
blink manera diamante. Nos a sera bunita amistad cu e dama mas activo, mas bunita mas
elegante trahando duro riba tur tereno social cultural , gozando di su pensioen , e hende muhe
empodera y activo di Boneiro Magaly Sumpter cu su nombernan artistico Magasu y Lady Bratz.
Un actrice grandi di peliculanan filma na Boneiro. Un shon di dama artista Poeta escritor stima
pa tur cu curason inspira den tur proyecto cultural bunita riba e isla dushi aki, cu su hendenan
nechi carinjoso hopi amabel cu curason di oro. Lieve Magaly ta un di e yuinan tesoro di Oma
Pipa Raimunda Martis, e curandera grandi di Boneiro, cu nos a bishita. Ki honor grandi pa Lady
Ruth topa cu e gran dama aki, cu ta yuda hopi awor pa medio di su poderoso oracion. E
cabayero gentil esposo di Magaly, Ruthson Bernabela “Yuyu” , a duna nos splicacion extenso di
e trabaonan na e salinjanan di salo, con esaki ta hinca den otro cu tur su detayenan. Un homber
fuerte cu amor gigantesco pa tur locual tin di hasi cu laman y pisca. Nos a topa cu shonnan
burico para den grupo of par par ta cana den mondi y cant’i caminda caminda autonan ta pasa
yen di turista cu ta strooi pida pida pan pa nan. Nos a topa cu Boneiro su bunita flora y fauna den
ful su splendor den un solo raya cu warawara y pelikaan bulando halto pasa dilanti nos bentana
di kamber di hotel na di dos piso. Yuwananan berde y grandi a bishita nos den restaurant band’i
pisina. Pero…nos motibo principal di nos estadia dushi na Boneiro tawata Lady Ruth su
participacion Diamars anochi, dia 3 di Maart 2026, como Poeta den nan actividad mensual “Luna
Yen” cu e luna aki a tuma lugar na cunucu biew cu presencia di un grupo bunita di nos grandinan
y hunto cu e demas dushi hendenan cu ta atende, presencia y of participa na Luna Yen a conta cu
casi 150 hende. Un anochi magico special y unico den su estilo cu hopi amor pa nan bario. Nos a
inspira dos poema pa Boneiro y a recita tambe e poema “Mainta riba montanja” di escritor
Carlos Nicolaas, saca for di e buki Pueblo di Kunuku Bieu -historia di un Bario skirbi pa Boi
Antoine na 1998. Ki bunita anochi ! MC Ubaldo “Bubu” Anthony, esposo di Yolanda, a dirigi e
anochi den un forma sublime y hopi poeta a recita nan bunita poema, e.o. Tica Nicolaas y
Regina”Uchi”Frans Anthonie. Por a scucha un grabacion di bos tremendo di Theo
“Kabuki”Frans cu asina tambe a participa den Luna Yen cu hopi amor pa su bario. Diaranzon
anochi nos a goza un mundo na Chogogo Hotel cu musica folklore tipico “Tutti Fruti”cu un
repertorio di kita sombre ! Mi dushi oldiesnan na papiamento, Toch mi sa di Rudy Plaate di
Corsouw, Abo so di Padu Lampe di Aruba y mas, hopi mas ! Tambe nan a toca y canta cantica di
e country singer John Denver. Tremendo ! Un trio di damas, entre nan, lieve Ema Sint.Jago cu
algun anja atras a ricibi su Tapushi Literario hunto cu Lady Ruth, for di mannan bondadoso di
Arte di palabra Corsouw, a canta algun set di canticanan super pero super bunita mes ! Canta y
yanga baila riba e dushi ritmo di e banda musical Tutti Fruti cu cantante estelar Roly Casimiri.
Ruthy “Lady Ruth” a canta, bayla y hasta toca un sorto di tambu. Danki lieve Lady Shirley
Martis y Lady Magaly pa e dushi compania ! Danki pa boso amor y amistad ! Nos ta yama danki
na un y tur cu a hasi nos estadia di 4 dia asina dushi, asina special ! Nos no tin palabra suficiente
pa gradici boso nan tur pa e atencion, e amor, e alegria cu boso a yena nos curason y nos alma cu
ne ! Nos a traha tempo tambe pa a bishita Biblioteca Publico di Boneiro situa den Kaya
Amsterdam Kralendijk, pa hasi entrega di e buki “Rene su dushi wega” cu Lady Ruth a skirbi y
publica no mucho tempo atras. Nos a hasi entrega di buki tambe na Fuhikubo , Boi Antoine, pero
di eseynan y mas den nos siguiente relato. Nos espacio normal di nos relato pa awe ta yen caba.
Danki pa lesa nos relato cu dushi y bunita chispanan di nos isla ruman Bonaire y su bunita y
dushi hendenan.
Capitulo 2 ta bini despues. Saludos y un “bearhug” di Ruthy “Lady Ruth” Vrieswijk-Bergen.
