Pregunta ta keda: “Unda e respet pa otro a keda?”
E proposicion pa e Ley di Consenso di Reino Finansa Publico Duradero Aruba (HOFA) a haci un paso mas den su proseso. A confirma cu Conseho di Minister di Reino (RMR) a duna luz berdè pa manda e proposicion di ley pa evaluacion na Raad van State di Reino pa conseho.
Cu e decision aki, despues di finalisa e proceso di consulta, a tuma un siguiente paso pa realisa e proposicion di ley conhunto entre Aruba y Hulanda.
Sinembargo, e paso aki ta causa preocupacion na Aruba. Na varios ocasion, politiconan Arubiano a indica cu e ley aki a wordo manda pa RMR sin consenso di Parlamento di Aruba, loke ta crea cuestionnan serio riba e proceso y e manera con e decision a wordo tuma.
Ley di Consenso: Cu a base riba recomendacionnan internacional
Segun e proposicion, Ley di Consenso di Reino HOFA ta establece reglanan pa logra y mantene finansa publico duradero na Aruba. Un presupuesto responsabel y bon maneho financiero lo forma parti importante di e sistema aki.
E ley di Reino ta conecta directamente cu e “Ordenansa Nacional pa Garantisa Finansa Publico Duradero (Lwho)”, cu ta un ley di pais Aruba mes. E normanan den e ley di Reino y e ordenansa nacional ta basa riba recomendacionnan di Fondo Monetario Internacional (FMI).
Segun Hulanda, ora e ley drenta na vigor, Aruba lo por haci uso di facilidad di fiansa cerca Hulanda pa financia inversionnan publico bou di condicionnan similar na esunan cu Hulanda tin riba mercado internacional.
Hulanda: Gastonan di interes lo baha
Segun Secretario di Estado di Asuntonan Interno y Relacionnan den Reino, Eric van der Burg, e medida aki lo contribui pa baha e gastonan di interes di Aruba.
Entre e promesanan menciona ta:
- Posibilidad pa presta placa bou di condicionnan faborabel similar cu Hulanda.
- Hulanda dispuesto pa refinancia parti di debe Arubiano riba mercado di capital Mericano.
- Reduccion di interes riba e fiansanan cu Aruba a recibi durante pandemia di COVID-19.
Segun Van der Burg, e placa cu Aruba logra spaar riba interes lo por wordo reinverti den enseñansa, cuido di salud y economia local.
Critica: Aruba ya tabata cumpli cu su obligacionnan
Sinembargo, Parlamento di Aruba a señala cu Aruba ya tabata cumpli cu su obligacionnan financiero sin retraso. Na varios ocasion, gobierno anterior a comunica Hulanda cu e pais tabata paga su debenan correctamente.
Segun e politiconan local, e pregunta central ta: si Aruba ya ta cumpli, pakico ta necesario un ley di Reino cu ta aumenta supervision externo?
Discusion riba autonomia y Status Aparte
Otro preocupacion importante ta e impacto potencial riba autonomia di Aruba dentro di Reino Hulandes.
Politiconan y e pueblo di Aruba mes ta argumenta cu Aruba tin un posicion unico dentro di Reino desde 1986 cu su Status Aparte, diferente di Curaçao y Sint Maarten.
Segun e argumento, Aruba no a expresa deseo pa sigui exactamente e mes modelo di supervision financiero cu e otro paisnan den Reino, pero tog Hulanda ta persisti.
Durante varios debate publico y inclusivo durante celebracionnan cultural, diferente grupo den sociedad incluyendo gremionan a expresa preocupacion riba posible perdida di identidad politico y autonomia nacional.
Cu Hulanda ta sigui e paso nan aki contra di tur porcedura corecto ta un falta di respet pa e pueblo di Aruba.
Gobierno: Un paso pa estabilidad financiero
Segun Mike Eman, e paso aki ta representa un momento importante di estabilidad y cooperacion dentro di Reino. Pero na mes momento ta crea un caos den pueblo di Aruba mes. Kico ta e interes di Prome Minister Mike Eman di AVP pa traiciona e pueblo di Aruba un biaha mas?
Tambe segun Eric van der Burg, den un mundo cada bes mas turbulento y impredecibel, cooperacion entre paisnan di Reino ta crucial pa logra stabilidad y progreso economico.
E meta, segun nan, ta crea confiansa, estabilidad y colaboracion pa enfrenta e retonan economico di futuro.
Pero e Pregunta politico y social ta sigui
A pesar di e explicacionnan oficial, discusion na Aruba ta continua. Politiconan ta plantea cu e proseso ta bay dilanti sin e consenso amplio di Parlamento ni di pueblo di Aruba.
Esaki ta genera pregunta importante dentro di comunidad:
- Pa ken realmente e ley HOFA ta beneficia?
- Con e ley lo afecta autonomia di Aruba?
- Y te unda supervision externo por bay sin afecta decisionnan local?
Mientras e proposicion di ley ta sigui su trayecto den e institucionnan di Reino, debate publico den Aruba ta keda activo riba e futuro di finansa publico y autonomia politico di e pais. Unda cu Hlanda y e gobierno actual AVP-FUTURO ta actua contra di e deseo di Parlamento di Aruba ya pueblo di Aruba.
Pa ken realmente HOFA / RHOFA ta beneficia ?