Un grupo di 15 studiante di Filomena College MAVO recientemente a participa den un biahe educativo di ocho dia na Italia como parti di e programa europeo Erasmus+, cu tin como meta fomenta intercambio cultural y educativo entre hobennan di diferente paisnan.
Despues di un proceso di seleccion extensivo, e siguiente alumnonan a haya e oportunidad pa forma parti di e delegacion: Keldrixia Arrindell, Shalienne Brown, Amir Croes, Jayson Cuevas, Kaylee-Ann Gomez, Brandon Kingsale, Erline Kock, Maya Gordon, Emily Mohamed, Kiandra Nicolaas, Valentina Rivas, Jennely Tromp, Qianna Werleman, Arthur Willems y Jhairion Williams. E grupo tabata acompaña pa e maestronan Raquel Lampe, Mariela Carrion y Daisy Franken.
Durante nan estadia na Italia, e alumnonan a bishita varios punto historico y cultural importante, incluyendo Museo Vaticano, Fontana di Trevi, Capilla Sixtina, Basilica di San Pedro, Colosseum y Panteon. Ademas, nan a participa den un workshop recreativo unda nan a siña con pa prepara pizza tradicional italiano.
E programa educativo tambe a inclui un recorido pa centro historico di Roma y un bishita na e prome Museum Station di Roma, cual a habri oficialmente apenas dos luna prome cu e grupo a yega.
Un componente central di e experiencia tabata e intercambio cultural y mobilidad studiantil realisa na ISSS Charles Darwin, unda e alumnonan a interactua cu studiante y docente local como parti di e iniciativa Erasmus+.
Cu e participacion aki, e grupo di Filomena College MAVO ta expresa nan sincero gradicimento na programa Erasmus+, na scol anfitrion ISSS Charles Darwin, y na tur docente cu a contribui na e experiencia, specialmente Antonio Sciortino y Eleonora Minelli. Ademas, e alumnonan ta gradici nan mes maestronan Raquel Lampe, Daisy Franken y Mariela Carrion, asina como tur mayor y colaborado cu a brinda apoyo pa haci e proyecto posibel.
