E rapport di estadistica mensual ta mustra e resultadonan di e strategia di segmentacion conforme e
Corporate Plan di Aruba Tourism Authority (A.T.A.) pa 2026, cu enfasis riba atrae bishitanten di balor
halto. E dato ta indica cu Aruba ta sigui atrae turista di calidad halto, cu un aumento notabel den
bishitanten cu ingreso halto. E tipo di bishitante aki ta gasta mas durante nan estadia.
E analisis riba ingreso (Household Income – HHI) ta confirma cu e enfoke ta dunando resultado. Segun e
dato di 2025, e porcion di turista for di Estados Unidos cu un ingreso anual di mas cu USD 150,000 a
crece cu 6.2%, mientras cu esnan cu un ingreso di mas cu USD 250,000 a registra un crecemento di 6.1%
compara cu e aña anterior. E crecemento den e dos gruponan aki ta subraya un preferencia creciente pa
experiencia di mas calidad y ta confirma cu Aruba ta sigui atrae bishitantenan cu mayor capacidad di
gasto di manera sostenibel. Tambe, den e luna di februari, Aruba a logra un score di 9.1 riba e Guest
Experience Index, reflehando un nivel halto di satisfaccion entre bishitanten. Pero, e ta subraya tambe e
importancia di sigui inverti den e producto Aruba y den e experiencia!
ESTADISTICA CONFORME ACTUALISACION DEN E INDUSTRIA DI TURISMO
STAYOVER, ESTADIA Y PARTICIPACION DI MERCADO
Den luna di februari 2026, Aruba a ricibi un total di 133.992 bishitante stayover, mientras cu e cantidad
total di nochinan di estadia a yega 963.552. Esaki a resulta den un promedio di estadia (Average Length of
Stay – ALOS) di 7,2 anochi, cu ta refleha un mescla consistente di duracion di estadia y tipo di biahe
durante e luna.
E distribucion di mercado durante februari a mustra cu Norte America a sigui ta e region cu e mayor
aporte, representando 77,9% di tur bishitante. Latino America a contribui cu 15,4%, Europa cu 4,6%,
mientras cu otro regionnan a representa 2,1% di total di yegadanan.
Dato di profiel di bishitante ta mustra cu Aruba ta sigui atrae un publico multigeneracional. Baby Boomers
y Generation X hunto a forma e mayor porcentahe di bishitantenan durante februari, mientras cu
Millennials y Generation Z tambe a representa un segmento importante. E combinacion aki ta refleha e
atractivo continuo di Aruba pa diferente generacion di biahero.
Den termino di conectividad aereo, e yegadanan durante februari a wordo sosteni pa un variedad amplio
di aerolineanan y rutanan for di diferente mercado. Estados Unidos y Canada a sigui lidera dentro di Norte
America, mientras cu Argentina a mantene un rol relevante dentro di Latino America. Pa Europa, Hulanda
a sigui ta mercado principal, sigui pa otro paisnan Europeo.
Bishita www.ata.aw tur luna pa e A.T.A. Statistical Monthly Report.
