Despues di un proceso di seleccion extensivo y meticuloso, e Hunta di Comisario a duna un bista detaya riba e pasonan cu a wordo hiba pa scoge e candidato mas apto pa e posicion di Presidente. Den e proceso aki, e enfoke principal tabata riba experiencia, integridad y un vision structural pa e institucion. Asina Presidente di hunta di comisario di Banco Central di Aruba Ari Swaen a indica
Rekisitonan Estricto di Experiencia
Un di e criterianan fundamental den e busqueda aki tabata e continuidad di e funcion. Pa e motibo aki, a exigi un minimo di 5 aña di experiencia den e posicion, cu un opcion pa extende esaki te na un maximo di 10 aña. E decision aki a wordo tuma pa garantisa stabilidad den e gobernacion di e banco y evita cu mester ripiti un procedura di seleccion asina compleho den un corto tempo.
E candidato principal, Mr. Domhoff, a wordo someti na un evaluacion hopi fuerte. Parti di e proceso aki tabata inclui tareanan pa cas (“homework”) caminda el a wordo pidi pa presenta solucionnan concreto pa problemanan hipotetico cu e por enfrenta como presidente. Segun e Hunta di Comisario, Domhoff a presenta un structura “masha impresionante” durante un jornada di entrevista cu a dura un dia henter.
Un Hunta cu Peso y Experiencia
E decision pa e seleccion no a wordo tuma aheno na e experticio necesario. E Hunta di Comisario cu a evalua e candidatonan ta consisti di:
- Dos registeraccountant cu mas di 40 aña di experiencia.
- Dos economista cu mas di 30 aña di trayectoria (incluyendo un ex-presidente di Banco Central di Antiyas).
- Un presidente di hunta cu 52 aña di experiencia profesional, di cual 36 aña ta como abogado.
E nivel di experticio aki a percura pa un serie di pregunta “tough” (dificil), caminda e candidato a sa di defende su mes y su vision masha bon, ganando e confiansa unanime di e board.
Screening y Aprobacion Final
Conforme e Ley di Banco, a presenta tres candidato na e Minister concerni, indicando cu Mr. Domhoff tabata e prome opcion y esun mas apto. Despues di e fase aki, e Veiligheidsdienst (Servicio di Seguridad) a realisa un investigacion rigoroso cu a inclui un bishita na Corsou pa entrevist’e.
E proceso a culmina cu e emision di un “Verklaring van Geen Bezwaar” (VGB), confirmando cu e candidato ta cumpli cu tur e rekisitonan di integridad y conducta personal. Finalmente, tanto e Conseho di Minister como Prome Minister mes a duna nan aprobacion final despues di combersacionnan personal cu e candidato, confirmando asina su nombramento.