Recientemente Comision di Desaroyo y Bienestar di Bario Mabon a organisa actividad
special pa adulto mayor bou di e titulo “Un Atardi Ameno cu nos 60 Plussers”, cu a
tuma luga na E Pleinchi di Mabon.
Durante e atardi, participantenan a disfruta di un ambiente calido y agradabel, yena cu
musica di antaño cu a crea un atmosfera di recuerdo y alegria. E actividad a cuminsa
cu presentacion di e Comision di Desaroyo y Bienestar di Bario Mabon, encabesa pa
Astrid Vries (presidente), hunto cu miembronan adulto Gloria Buddy, Danilla Rincones y
Nancy Calixta, y tambe hobenan Isaac Koolman, Georgy Calixta y Marcus Koolman,
kendenan ta contribui activamente na organisacion di actividadnan pa comunidad.
Como parti di e apertura, a tuma un momento di reconocemento pa honra memoria di
un habitante di bario, Sam Polonia, cu recientemente a fayece. Continua pa un oracion
na bienestar di comunidad.
E programa a inclui contribucion cultural y educativo, incluyendo un poema presenta pa
John Freddy Montoya di Departamento di Cultura, cu a logra conecta profundamente cu
e publico presente. Ademas, representantenan di National Platform Heritage of Slavery
in Aruba (PNHSA), Sra. Sirelda Jackson, Shirley Caines y Marlien Dokman, cu a
comparti informacion valioso riba herencia historico.
Actividadnan cultural a forma parti importante di e atardi, incluyendo un presentacion di
baile tradicional organisa pa grupo Expression Floklorico Viva Venezuela.
E encuentro a conta cu presencia di Minister Mervin Wyatt-Ras, kende den su palabra a
enfatisa importancia di comparti historia y balor di experiencia di adulto mayor como
fuente di sabiduria pa generacionnan nobo. El a subraya cu door di mantene y comparti
tradicionnan, comunidad por sigui fortalece su identidad y union.
Tambe Minister Rene Herdé a mustra su sosten pa e iniciativa, resaltando importancia
di reconoci rol di adulto mayor den desaroyo di comunidad.
Comision di Bario Mabon, cu tin un trayectoria di mas cu 15 aña, ta sigui comprometi na
desaroyo di bario, cu enfoke riba actividadnan pa hobenan, adulto y comunidad en
general.
E iniciativa ta conecta cu e vision di “Bon Comun”, cu ta promove colaboracion, union y
bienestar colectivo. Den e marco aki, representantenan di diferente bario, incluyendo
Mabon, a firma un Memorandum of Understanding (MOU) den 2026 pa fortalece
cooperacion y impulsa desaroyo comunitario.
Prome Minister Mike Eman no a logra di ta presente na e actividad, pero a manda su
palabra di sosten y exito pa e iniciativa.
E actividad “Un Atardi Ameno” a resulta den un exito, reenforsando importancia di crea
espacionan di encuentro pa adulto mayor, reconociendo nan aporte y fortaleciendo
lasonan dentro di comunidad.
