For di e sferanan oficial di Hulanda, e argumento ta zona sumamente ahusta y combinsente riba papel: fia placa via Hulanda ta nifica paga mita di e interes compara cu e mercado Mericano of internacional. Segun e calculo di Staatsecretaris Eric van der Burg na Den Haag, esaki lo nifica un aworo di decenas di miyones di florin cu por wordo inyecta den infrastructura, construccion di cas, y e sanacion y inversion den e refineria,un tema cu for di e mesun fuentenan Hulandes a wordo confirma cu tabata parti di combersacionnan cu Mike Eman (AVP) recientement na Hulanda.
Sinembargo, nos no mester lubida cu ta un secreto publico cu e vision aki ta corda comunidad cu e formula aki ta structuralmente mescos cu e periodo 2014-2017. E tempo ey, bou di gobernacion di AVP, a fia sumanan astronomico cu a hinca Pais Aruba den un crisis di debe sin precedente, lo cual netamente a habri porta pa Hulanda drenta cu supervision. E promesa actual di inversionnan multimiyonario den e refineria, financia cu debe nobo maske e interes ta mas abou ta wordo bisto como un bini bek di e mesun maneho ey. Gobierno di AVP –FUTURO ta hinca Aruba den un debe astronomico un biaha mas, pero ken lo mester bay paga esaki tardi of trempan ?
E Condicion Radical: No tin Placa Sin LAft/RAft
Hulanda no ta sconde e echo cu e status di interes faborabel, basa riba nan cualificacion financiero di ‘Triple A’, tin un prijs politico masha halto mes. E Fiesta di placa barata aki ta mara legalmente na un condicion definitivo: e aprobacion di e Ordenansa Nacional (Landsverordening) den Parlamento di Aruba y e dinamica structural di e Ley di Reino (HOvA/RAft) Eerste y Tweede kamer na Hulanda.
“Si nan rechasa e Ordenansa Nacional aya, e Ley di Reino tampoco no ta pasa. Y si e Ordenansa Nacional wordo rechasa, e ora ey nan mester fia simplemente riba otro mercado Staatsecretaris a declara enfaticamente.
E Dilema di Aruba: Autonomia Orguyoso of Dependencia Economico
Cu e panorama aki riba mesa, e escogencia pa e futuro di Aruba ta keda formula den dos opcion radicalmente opuesto:
Acepta e supervision structural: Alinia cu e plan cu AVP a bin ta preparando, optando pa e placa barata Hulandes pa por ehecuta proyectonan grandi (manera e refineria), pero aceptando cu Den Haag ta haya e ‘Masterlock’ structural pa dicidi riba finansa di Aruba, y den futuro lo dicidi kico por/mag na Aruba of no.
Pretende e mercado internacional: Rechasa e exigencia di Hulanda pa proteha e Staatsregeling (Constitucion), cu e consecuencia directo cu Aruba lo mester fia na interesnan hopi mas halto, limitando e capacidad di gasto publico pero conservando su soberania legislativo y por fia internationalmente. Tumando e trato cu Hulanda no ta respeta segun statuto con pa trata otro.
E situacion den Parlamento di Aruba ta keda describi for di Den Haag mes como “masha tenso mes.” Mientras Hulanda ta uza su miho porcentahenan di interes na mundo como as den manga, e pueblo di Aruba ta enfrenta e decision di permiti un structural “debe 2.0” of para firme den defensa di su autonomia constitucional unda cu ta paga Hulanda y despues drei riba propio ganashi sin depende di Hulanda.