Recientemente, Minister di Husticia mr. drs. Arthur Dowers a haci un bishita na Departamento di Recherche na Wayaca, unda el a reuni cu funcionarionan di e departamento riba entre otro e scarsedad di personal.
Minister Dowers a indica cu den ultimo tempo varios rechercheur a baha cu pensioen of a haya promocion y a sigui crece den Cuerpo Policial. Mirando cu pa varios aña no a recluta polisnan nobo, e departamento a keda cu personal limita, algo cu naturalmente ta crea presion riba e trabaonan diario y e maneho di casonan.
Minister Dowers a indica cu den Cuerpo Policial Aruba tin personal capacita cu por drenta Recherche pa yuda fortifica e departamento. E mandatario di Husticia a informa cu algun siman pasa caba, a instrui ehecutivonan di KPA pa percura pa tin suficiente rechercheur disponibel pa atende e cantidad di casonan cu e departamento ta maneha.
Minister Dowers a sigura cu e asunto aki tin su completo atencion y ta trahando activamente cu leiding di KPA pa trece solucionnan mas lihe posibel, pa asina crea mas trankilidad tanto pa e rechercheurnan como tambe pa e ciudadano cu a entrega keho y merece e siguransa cu nan caso ta haya e atencion necesario.
Relaciona cu un publicacion di Ministerio Publico den cual a pone enfasis cu e scarsedad di personal na Recherche ta debi na reduccion di presupuesto door di Gobierno, Minister Dowers a indica cu a haci recorte riba e presupuesto di “goederen en diensten” y no riba personal.
Al contrario, ta hustamente den e prome aña den funcion como Minister di Husticia na 2025 a percura pa recluta aspirantnan pa e klas pa polis nobo y den e prome mita di 2026 a bolbe recluta un klas nobo di aspirante pa KPA pero tambe pa KIA y asina tin mas na caminda.
Minister di Husticia lo sigui traha pa soluciona e scarsedad aki y tuma accionnan concreto pa fortifica capacidad operacional di Recherche y Cuerpo Policial.
Minister Dowers: situacion di personal na recherche tin debido atencion
