Den cuadro di e reunionnan di Interparlementair Koninkrijksoverleg (IPKO), e dianan aki a delibera largo riba e reformanan structural den e islanan di Caribe Hulandes, miho conoci como e ‘Plan di Pais’ (landspakketten) of e Regla Mutuo di Cooperacion (Onderlinge Regeling Samenwerking bij Hervormingen). Maria van der Sluijs-Plantz, kende a hiba palabra dilanti di e comision di IPKO, a duna un bista detaya di e resultadonan di e evaluacion reciente.
E evaluacion, cu a wordo presenta oficialmente, ta indica cu e cooperacion entre Hulanda, Aruba, Curaçao y Sint Maarten engeneral a cana bon, maske cu e ritmo y e facilidad di ehecucion ta varia pa cada pais. Segun Van der Sluijs-Plantz, tin paisnan cu a avansa mas rapido y structuralmente miho, mientras cu otronan tin mester di mas apoyo y asistencia tecnico pa por cumpli cu e metanan. Basa riba e resultadonan positivo aki, e comision a emiti un recomendacion oficial pa extende e cooperacion aki cu dos aña mas.
Mirando e historia di e cooperacion aki, Van der Sluijs-Plantz a recorda cu e proceso no a inicia di un forma facil. E cooperacion a cuminsa den tempo di e pandemia di COVID-19, un periodo den cual e islanan tabata sinti un presion grandi pa acepta e paketenan di pais (landspakketten).
E cooperacion a cuminsa un poco strof, pasobra el a inicia den tempo di COVID,” Van der Sluijs-Plantz a splica.
E la recorda e polemica y e discusionnan over di e proposicionnan anterior, manera CHE (Caribische Hervormingsentiteit) y COHO (Caribische Orgaan voor Hervorming en Ontwikkeling), cualnan no a wordo bon recibi den e islanan. Despues di e tensionnan aki, bou di e mando di ex-Secretario di Estado Alexandra van Huffelen, a logra firma e areglo Mutuo di Cooperacion na april 2023, locual a habri caminda pa un miho entendimento y cooperacion mutuo.
E Mensahe Central: SCOGE PRIORIDADNAN
Pa loke ta e futuro di e reformanan, Van der Sluijs-Plantz a lanza un conseho y un mensahe hopi cla pa e gobiernonan di e islanan: mester establece prioridadnan realistico. E evaluacion ta mustra cu e landspakketten ofisial tabata demasiado ambicioso y hopi amplio. Maske e documentonan tabata duna un bon bista general di tur locual mester cambia, no ta posibel pa haci tur cos pareu.
E mensahe central pa e paisnan ta pa sinta structuralmente, analisa e necesidadnan di mas urgente di nan pais, y dicidi kico ta bin prome, prome cu inverti recurso den otro asuntonan. Busca bo prioridadnan. Kico bo ta haci prome, prome cu bo haci algo otro? Kico bo pais tin mas mester, pa asina bo por core bo pais na un bon manera,” Van der Sluijs-Plantz a conclui, enfatisando cu e principio aki ta conta pa tur e islanan, maske cada un den nan mesun proporcion y bista.