Parlamentario Jennifer Arends-Reyes ta extende su mas sincero felicitacion na tur studiante cu e aña aki a logra culmina nan estudio y obtene nan diploma. Segun e parlamentario, e logro aki ta representa fruto di hopi esfuerzo, perseverancia, disciplina y dedicacion durante añanan di preparacion academico.
Arends-Reyes a enfatisa cu e exito di un graduado no ta solamente resultado di su propio trabou, sino tambe di e apoyo cu nan a ricibi for di mayornan, famia, docente, amigonan y tur cu a contribui na nan desaroyo personal y academico.
“Un diploma no ta solamente un papel. E ta representa tur e ora di estudio, tur e reto cu bo a supera y tur e momento cu bo a sigui dilanti, hasta ora cu e caminda tabata dificil. Awe ta un momento pa sinti orguyo di loke boso a logra,” Arends-Reyes a declara.
Segun e parlamentario, graduacion marca e final di un etapa importante den bida, pero na mesun tempo e ta habri porta pa nobo oportunidadnan den educacion, profesion y desaroyo personal.
“Cada graduado tin motibo pa celebra. Esaki ta un momento cu lo keda graba den memoria pa semper. Mi ta felicita tur studiante cu a alcanza e meta aki y ta desea nan hopi exito den e siguiente paso cu nan lo tuma den nan bida,” el a expresa.
Na mes momento, Arends-Reyes kier manda un mensahe special di animo y encurashamento na e studiantenan cu ainda mester presenta un herexamen.
Segun e parlamentario, no mester mira herexamen como un oportunidad adicional pa demostra determinacion, perseverancia y confianza den nan mes.
“No perde curashi. Un resultado no ta defini bo talento, bo balor ni bo futuro. Uza e dianan cu ta bin pa prepara bo mes bon, pidi yudansa ora cu ta necesario y mantene confianza den bo capacidad. Tin biaha e caminda ta tuma un tiki mas largo, pero esey no ta nifica cu bo no lo yega na bo destino,” Arends-Reyes a declara.
E parlamentario a enfatisa cu Aruba tin necesidad di un generacion di hobennan prepara, creativo, emprendedor y comprometi cu comunidad. P’esey e ta anima tur graduado pa sigui inverti den nan conocemento, sigui desaroya nan talento y sigui contribui positivamente na futuro di nos pais.
“Nos pais tin necesidad di boso energia, boso creatividad y boso liderazgo. Sigui studia, sigui siña y sigui traha pa realiza boso soñonan. Aruba ta conta cu boso,” el a agrega.
Arends-Reyes a conclui su mensahe cu un palabra di felicitacion pa tur graduado y un mensahe di speranza pa esnan cu ainda tin un ultimo paso pa completa.
“Celebra e logro aki cu gratitud, pero sigui soña grandi. E diploma ta cera un capitulo, pero na mes momento e ta habri porta pa un futuro yen di oportunidad. Na tur graduado: pabien! Y na tur esnan cu falta nan herexamen: sigui dilanti, prepara bo mes y kere den bo mes. Boso por logra esaki.”
Parlamentario Jennifer Arends-Reyes ta felicita graduadonan y anima esnan cu ainda mester haci herexamen
