Parlamentario Endy Croes a trece dilanti su punto di bista tocante e desaroyonan mas reciente rond di e biahe cu Minister Gerlien Croes a realisa na fin di november 2025 pa topa cu e seleccion di futbol di Corsou. Como cu tabata trata di un dienstreis oficial aproba pa Conseho di Minister, caminda e gastonan di pasashi, hotel y daggeldvergoeding a wordo cubri pa gobierno, e mandatario tabatin e responsabilidad di uza e buelo comercial cu a wordo cumpra p’e.
En bes di esaki, e minister a biaha algun dia prome cu e fecha stipula den un jet priva, acompaña pa un consehera y miembronan di prensa. E parlamentario a expresa cu e argumento di e minister, cu e mes a paga pa e jet priva y cu p’esey e no tin e deber di duna cuenta ni presenta recibo na Parlamento, no ta valido. Segun Endy Croes, un jet priva no ta autorisa pa cobra un cliente individual debi cu e no tin e licencia di operacion (Air Operator Certificate – AOC) necesario pa haci esaki.
E Trayecto Legal via LOB y LAR
Debi na e falta di contesta y transparencia desde december 2025, parlamentarionan Evelyn Wever-Croes y Rocco Tjon a haci uzo di nan derecho como ciudadano via e Landsverordening Openbaarheid van Bestuur (LOB). E ley aki ta obliga gobierno pa duna acceso na informacion publico y e comprobantenan di pago.
Sinembargo, Minister Gerlien Croes a rechasa e peticion aki argumentando cu e no a wordo entrega conforme e rekisitonan prescribi, creando asina un discusion legal pa retrasa e proceso di duna contesta riba e preguntanan haci. Como resultado di e postura aki di e mandatario, e parlamentarionan a acudi na e Bezwaaradviescommissie Landsverordening Administratieve Rechtspraak (LAR) pa apela e decision di gobierno.
Decision di LAR
Riba 10 di juli ultimo, e Comision di LAR a notifica e parlamentarionan Wever-Croes y Tjon cu un decision a wordo tuma y cu e conseho final a wordo manda pa Minister Gerlien Croes. Segun e reglanan stipula pa ley, e minister tin e obligacion pa entrega un copia di e conseho aki na e partidonan concerni y tin un plaso di 6 siman pa tuma un decision final.
Segun Parlamentario Endy Croes, e echo cu e minister no a haci e conseho aki publico ta un indicacion cu e resultado no tabata na su fabor. El a enfatisa cu e mandatario tin e obligacion di cumpli cu ley, y cu si e sigui nenga di duna claridad, e siguiente paso lo ta un proceso den Corte di Prome Instancia. Parlamentario Endy Croes a finalisa bisando: “You can run, but you cannot hide!