Intento di insendio
Djárason 5 di ougùstùs, alrededor di 12.40 or di mardugá, ‘meldkamer’ sentral a risibí notifikashon tokante un kaso di intento di insendio na Kaya Demerara. Segun e persona ku a mèldu, deskonosínan a purba kima un outo stashoná den un kurá. Na yegada di polis, no a topa ku e sospechosonan na e sitio. Ta investigando e kaso.
Detenshon pa maltrato
Djamars 4 di ougùstùs, alrededor di 2 or di atardi, a detené un hòmber di inisial E.V.O.N. di 50 aña di edat na Kaya Neerlandia pa maltrato. Investigashon den e kaso ta kontinuá.
Detenshon pa manehá bou di influensia di alkohòl
Djamars 4 di ougùstùs, alrededor di 3.50 or di mardugá, a detené un hòmber di inisial J.A.B.C. di 23 aña di edat riba Kaya Andres A. Emerenciana. Un patruya a mira un outo ta kore zeilu i a par’é pa un kòntròl. Durante kòntròl, e tabata mustra diferente karakterístika di un persona ku ta bou di influensia di alkohòl. A hasi tèst di supla kuné i a resultá ku el a konsumí mas alkohòl ku ta pèrmití pa lei. Ademas e sospechoso no por a mustra un reibeweis i tampoko dokumentunan di seguro. Pa e violashonnan menshoná, el a haña but i un prosèsferbal.
Ladronisia di bebida i karni for di kònteiner
Djaluna 3 di ougùstùs a drenta keho di ladronisia for di diferente kònteiner riba tereno di un kompania na Hanchi Amboina. Deskonosínan a haña akseso na e kònteinernan i bai ku entre otro diferente bebida alkohóliko i karni. Relashoná ku e kaso aki a konfiská un pikòp den bario Amboina pa mas investigashon. Investigashon den e kaso ta kontinuá.