Un prik, Gran proteccion
Directie Volksgezondheid (DVG) ta informa cu e vacuna contra influenza pa temporada 2026-2027 a yega Aruba y ta disponibel pa personanan cu ta pertenece na un grupo di risico y pa esnan cu ta desea di cumpra esaki.
Influenza ta mas cu un simpel griep. E virus por causa complicacionnan serio y hasta hospitalisacion, especialmente cerca personanan cu ta mas vulnerabel. Vacunacion ta yuda reduci e riesgo di bira hopi malo como consecuencia di influenza.
Entrante dialuna 14 di september 2026, personanan cu ta pertenece na un di e gruponan di risico aki bou por pasa vacuna na Seccion di Malesanan Infeccioso, situa na Avicenastraat 1, parti atardi entre 1:00 pa 4:00.
E gruponan cu ta bin na remarca pa vacunacion gratis ta:
*Personanan di 60 aña of mas;
*Adultonan entre 18 y 59 aña cu ta pertenece na un grupo di risico medico;
*Adultonan y muchanan cu ta pertenece na un grupo di risico medico halto, por ehempel personanan cu un trastorno serio di defensa;
*Personanan cu, debi na nan condicion medico of tratamento, a haya indicacion di nan *dokter di cas, specialista of pediatra pa vacuna;
*Muhernan na estado cu ta cumpli cu e criterianan medico pa vacunacion;
*Trahadornan den cuido cu tin contacto directo cu pashent, especialmente pashent vulnerabel.
Personanan di 60 aña of mas mester trece nan carchi di AZV pa haya e vacuna gratis. Personanan cu ta pertenece na un grupo di risico, pero cu no tin 60 aña ainda, mester trece nan carchi di AZV y un recept di nan dokter di cas of specialista.
Pa esnan cu ta desea di cumpra e vacuna esaki tin un costo di afl 20,- y por haci esaki entre 1:30 cu 3:30 di atardi. Na momento di cumpra mester trece un ID valido y pago ta posibel unicamente via swipe.
Preparacionnan ta tumando luga pa manera tur aña, ofrece e vacuna tambe den diferente bario di Aruba. Asina cu e programa ta completamente cla, DVG lo publica e fecha, horario y lugarnan unda e bus di vacunacion lo para.
DVG ta conseha tur persona cu ta pertenece na un grupo di risico pa vacuna na tempo.
Bo Salud, Nos Prioridad
Pa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, sigui nos den WhatsApp Channel, ricibi tur informacion den Aruba Health App, bishita www.dvg.aw, yama 5224200 of manda email na servicio@dvg.aw