Ta para scirbi den Genesis 1:27 Dios a crea hende segun Su mes imagen, segun e imagen di Dios E a crea hende ,homber y muher E a crea nan.
Ora hende ta papia malo di otro, calumnia, chercha, haci bofon,redo,rebaha otro, nan ta deshonrando Dios kende a crea hende segun Su mes imagen .
Den 1 Juan 4:20-21 ta para scirbi: Si un hende bisa mi ta stima Dios,y ta odia su ruman,e ta un ganjado,pasobra esun cu no ta stima su ruman cu e a mira, no por stima Dios Kende e no a mira.
E mandamento aki nos tin di dj’E. Cu esun cu ta stima Dios mester stima su ruman tambe.
Pesey tambe e palabra di Dios ta hala nos atencion hopi fuerte den Santiago 3:8-12 pa nos tene cuenta kico nos ta papia di nos prohimo:
Ma lenga ningun hende por mansa. E ta yen di maldad sin sosiego,y ten di veneno mortal.
Cune nos ta bendiciona nos Senjor,y Tata , y cune nos ta maldiciona hende,kende a wordo traha den semehansa di Dios.For di mesun boca ta sali tanto bendicion como maldicion. Mi rumannan e cosnan aki no mester ta asina.
Hopi biaha orguyo y favoritismo ta pone nos papia malo di hende, door cu nos ta aprecia un mas cu otro, hopi biaha nos no ta comprende, cu esun cu ta trece redo pa nos no kier nos bon, pasobra e ta pone nos rabia,peca, y desea malo pa nos prohimo.
Pesey Scritura ta bisa den Santiago 4:6: Dios ta resisti e orguyosonan, ma ta duna gracia na e humildenan.
No papia malo un di otro rumannan.( Santiago 4:11).
Efesionan 4:29 ta para scirbi: No laga ningun palabra danino sali for di boso boca,sino solamente palabra cu ta bon pa edificacion, comforme e necesidad di e momento . Pa esaki por duna gracia na esnan cu ta tende.
Ora nos ta falta respet, na nos prohimo, of ora nos ta persigi nos prohimo, nos ta den caminda di error . Pasobra Dios no ta agrada den esey.
Ta bon pa nos tene cuenta cu locual ta para scirbi den 2 Timoteo 3:1-9 y sabi cu nos ta bibando den tempo trabahoso, y esey nos ta mire den cambio di karakter y conducta di hende, tur esaki a wordo scirbi pa preveni cu nos ta wordo lastra bay cune den e sistema di mundo.
Pasobra moral y respet ta den un decadencia profundo, pasobra hopi hende a lubida e palabra nan cual nos a lanta cune, cual ta bon dia, bon tardi, bonochi, despensa, y esun mas principal te mayan cu Dios kier. Hende su bista ta riba placa, riba material, sin respet pa mayor,mas bien stimado di placer cu stimado di Dios.
Hende ta neglisha nan yiu, pa supuestamente nan gosa bida , den alcohol, droga y paranda, bao di un capa diabolico cu yama “Gosa Bida” y asina ta cay den adulterio y tur clase di bagamunderia, cu nan ta wak tur cos bunita, sin ripara e destruccion cu poco, poco ta drenta den nan cas.
Pero corda kico e palabra di Dios ta bisa den 1 Juan 1:9 pasobra nos tur tin oportunidad di arepenti y drecha cos serca Dios.
Dios su palabra ta bisa den Romanonan 2:11. Pasobra no tin disticion di persona serca Dios.Pesey no laga diabel ganja bo y keda den scuridad.
Corda cu e palabra di Dios ta bisa den Hebreonan 12:14 .Aspira pa tin pas cu tur hende, y santificacion , sin cual ningun hende lo mira Senjor.
Sinceramente, Pastor Marcel Balootje.