Ministerio Publico (OM) ta bolbe lansa un alerta na comunidad despues cu a detecta un ola nobo di intentonan di fraude via SMS y yamadanan telefonico falso, miho conoci como scam. E mensahenan aki, cu aparentemente ta wordo manda orkesta desde Marokko, ta purba engaña ciudadanonan indicando cu nan tin un boet di trafico pendiente cu debi wordo paga.
E scenario fraudulento aki a lanta su cabes di nobo caminda cu decenas di ciudadano a tuma contacto cu autoridadnan pa raporta e situacion. Solamente den oranan di mainta, a registra caba alrededor di 40 yamada di persona cu a ricibi e SMS-nan engañoso of cu a wordo contacta via telefon.
Afortunadamente, danki na e cautela y alerta di e publico, hopi ciudadano a reconoce mesora cu e comunicacion aki no ta legitimo y no a cay den e trampa financiero.
Ministerio Publico ta enfatisa y aclaria categoricamente e procedemento oficial pa evita cu cualkier persona ta keda victima di e tipo di engaño aki:
Comunicacion oficial ta via carta: OM nunca ta contacta ciudadano via SMS ni via yamada telefonico pa cobra boet di trafico of pa exigi pago directo. Tur notificacion oficial di Ministerio Publico ta wordo manda unicamente via carta fisico.
No habri link sospechoso: Si bo ricibi un SMS of mensahe cu ta pidi bo pa haci un pago of pa klik riba un enlace (link) pa haci un transaccion di boet, e ta 100% falso.
Verifica prome cu actua: Den caso cu bo ricibi un di e mensahenan aki, ignora e contenido, no duna ningun informacion personal of bancario, y no haci ningun pago.
Autoridadnan ta haci un yamada na tur ciudadano pa keda vigilante, no duna credito na e mensahenan aki, y comparti e informacion aki cu familiar y amigonan pa proteha henter e comunidad contra e red di stafa aki.