Un buki nobo na Papiamento, scirbi pa e autor local Edgar Ras, ta hiba e lector bek dos siglo den tempo, E obra literario aki ta resalta e figura di Willem Rasmijn un much’homber cu tabata cuida carnero y cu a descubri e prome piesa di oro na Aruba dunando e mucha inocente aki un cara, un voz y e reconocemento cu historia a neglisha.
E e chispa pa e investigacion y redaccion di e buki aki a nace di un memoria di infancia di e autor.Edgar Ras ta recorda cu dia e tabata den di 5 grado di scol basico, den e buki di historia “Nos Patria”, tabatin un mencion chikito di e nomber di Willem Rasmijn. E detaye ey a keda den su memoria y a sirbi como e base pa cuminsa, investiga y duna bida na e personahe aki, kende awe ta wordo considera como e prototype di un berdadero heroe Arubano.
E narrativa ta transporta e lector pa e Aruba pre-industrial: un isla inocente, calmo y simpel, caminda e much’homber tabata cana pia abao busca yerba pa su carnenan. E descubrimento di e klompi oro a cambia e rumbo di e isla, e yegada di comerciantenan y e intervencion di gobierno Hulandes .
E buki ta destaca pa su capacidad di duna sentimento y empatia na e protagonista. E lector ta sinti e dolor di e mucha canando den mondi cu pia sangrando y ta biba e angustia di un famia humilde den un epoca di pobresa.
Mantenendo un structuracion literario di halto nivel, e autor ta laga un final habri, comparabel cu e famoso obra El coronel no tiene quien le escriba di e Premio Nobel Gabriel García Márquez. E buki ta plantea e pregunta di kico a pasa cu e di tres generacion di e much’homber aki, si e la casa, si e tin yiu, of kico a bira di su bida despues cu e fiebre di oro cu a cambia e historia di Aruba.
E obra aki no ta simplemente un buki di lectura, sino un recurso didactico di gran balor pa scolnan basico y avansa na Aruba. Por uz’e den un contexto multidisciplinar den e siguiente materianan:
Papiamento & Literatura: Pa analisa e estilo narrativo, e uzo di e idioma autentico y e comparacion cu literatura internacional.
Historia: Pa compronde e impacto di e descubrimento di oro y con esaki a habri paso pa e desaroyo economico di e isla.
Geografia & Geologia (Aardrijkskunde): Pa studia e suelo Arubano y e excavacion di mineralnan precioso.
Arqueologia & Matematica: Pa compronde e balor di e rikesa y e aspecto fiscal den e prome pasonan di e economia local.
Skirbi originalmente na Papiamento di Aruba, e buki aki ta representa un joya di literatura local autentico. E autor tin plania pa desaroya “spin-offs” y versionnan den otro idiomanan (cuminsando cu Hulandes), permitiendo cu e historia di Willem Rasmijn y e identidad Arubano por wordo conoci no solamente den e region Caribeño, sino tambe a nivel internacional. Asina Linguista y historiado Mirto Lacle a splica