Den cuadro di e intensificacion di e trabounan legislativo, Presidente di Parlamento di Aruba, Marlon Sneek, a duna detaya di pakete di temanan di interes nacional cu lo ta riba mesa di discusion den e proximo periodo. E schema ta busca pa duna e parlamentarionan e tempo necesario pa haci nan preguntanan por escrito, permitiendo cu Gobierno por contesta na tempo prome cu yama e reunionnan publico oficial.
Futuro di e terreno di Refineria
Un di e pasonan principal ta e presentacion cu lo wordo duna pa e comision instala pa Gobierno pa analisa e tereno di e refineria. En conexion cu e mocionnan cu a pasa den Parlamento cu ta stipula no solamente e desmantelacion, sino tambe e exploracion di otro tipo di actividadnan economico pa e area ,e parlamentarionan lo evalua e diversificacion y e posibel uzonan pa e tereno industrial aki.
Revisión di Ley LNT y e “Wever-Croes Norm”
Marlon Sneek a confirma cu e Minister di Finansas lo ta presente den Parlamento pa midi e sintimento y e posicion di e representantenan di pueblo pa loke ta e Ley di Normering Topinkomens (LNT). E ley aki, introduci durante e periodo di pandemia, a establece e “Wever-Croes norm” pa corta y limita e salarionan den sector publico y den e companianan di Gobierno (overheids-NV’s). Esaki tabata un di e exigencianan di Hulanda tambe pa por a haya e placa di COVID
E meta principal pa revisa e ley aki ta pa frena e fuga di talento. Segun Sneek a splica, e limitacionnan salarial a haci cu Aruba a perde un cantidad considerabel di profesionalnan capacita, fihando e capacidad pa atrai experto cu por encabesa y dirigi e puestonan di responsabilidad den e organonan estatal.
Pakete financiero y Presupuesto 2027
Riba e agenda legislativo tin tambe un serie di proyectonan di ley financiero cu ta drentando Parlamento pa nan tratamento formal, entre nan:
E prome ahuste presupuestario (Suplementaire Begroting 1).
E Ley di Contabilidad.
E Presupuesto di Pais Aruba pa aña 2027.
E Presidente di Parlamento a enfatisa e importancia di un bon planificacion di tempo pa garantisa cu e proceso democratico wordo ehecuta debidamente, duna espacio pa analisis profundo y tene debatenan transparente pa e comunidad.