Den kuadro di e aktividatnan relashoná ku Luna di Turismo, Tourism Corporation Bonaire (TCB) riba djasabra 19 di sèptèmber eksitosamente a organisá e di kuater spùrtògt turístiko na Rincon. E evento a trese muchanan lokal den edat di 8 pa 12 aña huntu, pa un eksperensia edukativo i plasentero, rònt di diferente sitio turístiko i históriko.
Pa di dos aña tras di otro Crystal Innovations a keda enkargá ku un spùrtògt dibertido i interaktivo na Rincon pa TCB, kaminda nan a enkurashá e biaheronan eksplorativo hòben pa deskubrí e sitionan, e karakter i e bunitesa úniko di e bario akí.
E aña akí nuebe tim a partisipá, kaminda kada tim a konsistí di sinku mucha bou di guia di un adulto. Pa duna e reto un toke kreativo, e aña akí e tema tabata ‘nos kosecha’. Kada tim a haña un fruta òf bèrdura manera yambo, promentòn, mespel, maishi chikí, pampuna, shimaruku, kenepa, lamunchi òf papaya i nan mester a prosesá esaki den nan trahe. E trahenan kolorido i yen di fantasia a sòru pa plaser i kreatividat adishonal na e evento.
Durante e diferente paradanan i aktividatnan na Rincon, e partisipantenan a siña mas tokante Boneiru i su historia riku. A klousurá e evento ku un lùnch na Kos Bon So, kaminda tur partisipante a haña tambe un regalo di partisipashon, opsekio di TCB.
E ganadónan ta risibí nan premio durante e próksimo evento di ‘Taste of Bonaire’ riba djasabra 26 di sèptèmber, kaminda klousura di e Luna di Turismo ta tuma lugá.
Di kurason TCB ke gradisí tur grupo ku a partisipá pa e echo ku nan a hasi e spurtògt turìstiko di e aña akí un eksperensia plasentero i inolvidabel.
