Despues di Tripartite na Corsou, PPA ta mira progreso riba e topico ‘geschillenregeling’: “Ora
Aruba tin un conflicto cu Reino, no por ta, cu e pais mas grandi automaticamente tin e ultimo
palabra.” Kico ta pasa ora Aruba y Reino Hulandes no ta di acuerdo? Ken tin e ultimo palabra:
derecho of e parti cu tin mas poder?
E pregunta aki tabata un di e temanan importante durante e reciente Tripartite na Corsou,
caminda e Parlamentonan di Aruba, Corsou y Sint Maarten a reuni pa trata e asuntonan cu e
tres paisnan tin en comun y busca unda nan por fortalece otro.
Pa parlamentario Eduard Pieters (PPA), un di e progresonan mas importante ta riba un dossier
cu ya tin mas di 15 aña pendiente: e ‘geschillenregeling’. Un mecanismo pa atende disputa
dentro di Reino, ora dialogo politico no ta logra resolve nan.
Aruba tambe mester por defende su derecho
Un conflicto dentro di Reino por mishi cu interpretacion di Statuto, autonomia of limite di
autoridad entre Reino y un pais. Desde 2010, articulo 12a di Statuto ta contempla un ‘regeling’
mediante Rijkswet pa trata cierto disputa. Pero durante e añanan no a logra yega na un modelo
aceptabel pa e paisnan den Reino. Pa Pieters, esey ta toca e esencia di igualdad dentro di Reino.
Ora Aruba, of cualkier otro pais den Reino, tin un conflicto cu Conseho di Minister di Reino,
resultado no por depende simplemente di e realidad cu Hulanda ta mas grandi, door cu nan tin
18 minister den e Conseho di Minister di Reino. E pregunta mester ta: ken tin rason segun
Statuto?
Tres pais, un posicion mas fuerte
Un proposicion anterior a wordo no a conta cu conseho positivo di e.o. Raad van State.
Despues, e tres paisnan Caribeño a sigui traha hunto riba un alternativa. Pa Pieters, hustamente
esey ta e lesnan politico. Aruba, Corsou y Sint Maarten ta mas fuerte, ora nan no enfrenta cada
problema constitucional separadamente, sino comparti conocimento y defende e interesnan
comun hunto.
No solamente politico a contribui, sino e profesionalnan huridico di e tres paisnan a participa
den e trabou tecnico, mientras a incorpora e observacionnan di Raad van State den e proceso.
Segun Pieters, durante e Tripartite na Corsou a presenta un version final, cu awor mester sigui
su trayectoria democratico.
Un ‘oordeel’ mester tin peso
E propuesta actual ta contempla un rol importante pa Raad van State van het Koninkrijk, ora no
por resolve un disputa politicamente. Pero pa Pieters, un ‘geschillenregeling’ solamente tin
sentido, si e resultado realmente tin consecuencia.
No por crea un mecanismo pa determina ken tin rason, pa despues e parti mas poderoso
simplemente ignora e ‘oordeel’. Esey ta precisamente pakico e debate ta hopi mas grandi cu un
procedimento huridico. Ta trata di balans di poder dentro di Reino.
Mas di 15 aña: awor Parlamento mester move
Pieters ta enfatisa cu e ‘geschillenregeling’ ainda no ta un ley vigente. E proceso democratico y
legislativo mester sigui y e Parlamentonan mester trata e resultado cu a alcansa.
Pero despues di mas di 15 aña, segun Pieters, finalmente tin perspectiva pa avansa.
Y pa PPA, e Tripartite di Corsou a mustra algo mas: cooperacion entre e tres paisnan Caribeño
por produci resultado concreto. ‘Geschillenregeling’ no ta un instrumento cu Aruba kier uza tur
ora y idealmente, e paisnan ta resolve diferencia mediante dialogo, paso no mester pone
autonomia na prueba, ora tur hende ta di acuerdo. E berdadero prueba ta, ora Aruba bisa “no”
y Conseho di Ministro di Reino bisa “si.” Y e dia ey Aruba no mester depende di fabor politico, ni
di ken tin mas poder.
“Den un Reino di cuater pais, derecho mester pisa mas cu poder. Esey ta e proteccion cu Aruba,
Corsou y Sint Maarten mester tin,” Eduard Pieters a finalisa bisando.
