Su Mahestad e Rey lo asisti dialuna mainta 16 di november na e conmemoracion di 250 aña di ‘The First Salute’ na Sint Eustatius. Prome minister Rob Jetten y secretario di estado di Asuntonan Interno y Relacionnan den Reino, Eric van der Burg, tambe lo ta presente na e ceremonia di conmemoracion. Ademas, Rey Willem-Alexander lo bishita algun proyecto di e ‘Regio Deal Statia 2026’. Esakinan ta projectonan cu na Sint Eustatius ta contribui na desaroyo economico duradero, restoracion di herencia cultural y mehoracion di e calidad di bida na Sint Eustatius.
Despues di e bishita na Fort Amsterdam y e ruina Rotterdam, cu ta den cuadro di e pasado di sklabitud, prome minister Jetten lo sigui un otro programa.
Diadomingo 15 di november
Historia di Sint Eustatius
Rey Willem-Alexander y prome minister Rob Jetten lo yega Sint Eustatius diadomingo atardi, unda gezagheber Alida Francis lo ricibi nan. Anochi e delegacion lo bishita e historico Fort Oranje, unda un presentacion di sonido y lus lo representa e historia di Sint Eustatius. Tambe lo tin un presentacion di e cantante Shirma Rouse.
Riba invitacion di gezagheber Francis, e delegacion lo bai mas lat den anochi na Knippenga Estate pa un cena oficial cu representantenan di e comunidad di Statia.
Dialuna 16 di november
Conmemoracion di ‘The First Salute’
Cu un guardia di honor, gezagheber Francis lo ricibi Rey Willem-Alexander mainta trempan pa asisti na e conmemoracion di 250 aña di ‘The First Salute’.
Despues di hisa e banderanan, e parti plenario lo cuminsa cu canto di e himnonan nacional y e palabra di bonbini di gezagheber Francis. Despues, Rey lo tene un discurso. Cu participacion di un barco mericano, lo sigui e recreacion (tiro di saludo), cu cual e conmemoracion di 250 aña di independencia di Merca lo yega na su fin.
Apertura di Museo Fort Oranje
Museo Fort Oranje ta situa den e murayanan di Fort Oranje y ta conta e historia for di ‘The First Salute’ den bista di e hendenan esclavisá. Pa medio di comparti informacion y cueta, e historia di sklabitud di e isla ta bira visibel pa bishitantenan. Despues cu Rey haci e apertura di e museo oficialmente, e delegacion lo haci un rond den e museo. Durante e rond, nan lo papia cu algun representante di museonan y organisacionnan cu a yuda haci e realisacion di e museo na Sint Eustatius posibel.
Parada
Durante e conmemoracion anual di Statia Day, ta custumber pa padvinder y otro gruponan uniforma ta prepara pa e parada. Rey Willem-Alexander y e delegacion lo ta presente na e plenshi central na Oranjestad pa saluda nan.
Recorido cu baiskel na pilarnan VR
Tambe Rey Willem-Alexander lo haci un recorido cu baiskel pasando na e pilarnan VR. E pilarnan ta forma parti di e ‘Digital Heritage Route’, cu ta un parti di e Regio Deal Statia 2026. E pilarnan ta ekipa cu codigo QR y ta situa na luganan estrategico serca di sitionan di herencia importante riba e isla. Na comiansa di e recorido cu baiskel, e Rey lo desvela e prome pilar, cu cual e ruta ta oficialmente habri.
Desayuno
Despues di e recorido cu baiskel, Rey lo bai na e sitio di desayuno, caminda e lo papia cu habitantenan di Statia tocante bida riba e isla.
Fort Amsterdam y ruina Rotterdam
Despues, Rey y e delegacion lo sali pa un otro proyecto di e Regio Deal: Fort Amsterdam y ruina Rotterdam. Akinan ta realisa un sitio di conmemoracion cu atencion pa e pasado di sklabitud. E sitio di conmemoracion ta bini riba e sitio caminda a baha miles di hende esclavisá na tera. Meimei di Fort Amsterdam tabatin un edificio di dos (2) piso cu galerianan largo. Abou nan tabata encarsela e hombernan esclavisá y ariba e muhernan. Akinan tabata tambe e mercado pa bende nan di nobo na plantashinan den resto di Caribe y America. Despues di e abolicion, sklabitud a bira un tabu y a laga e forti cai na decadencia cu intencion, pa sconde e historia. Rey Willem-Alexander y prome minister Rob Jetten lo cana riba e tereno, lo haña explicacion tocante e plannan di restoracion y lo papia cu miembronan di e Herdenkingscomité Slavernijverleden (Comite di Conmemoracion Pasado di Sklabitud) y cu hobennan tocante e rol di e pasado aki den nan bida.
Programa di atardi
Cas di cuido
Ademas, Rey Willem-Alexander lo bai na un cas di cuido, unda nan lo inform’E tocante e situacion actual di un centro nobo cu lo construi. E ambicion ta pa reuni e cas di cuido, hospital, botica, Mental Health Care y GGD hunto den e centro aki. E centro aki tambe ta parti di e Regio Deal y ta enfatisa e importansia di bon cuido serca pa tur habitante di e isla. Tambe Rey lo papia cu algun habitante y hende grandi invita tocante bida na Statia, tradicion-, recuerdo- y cambionan riba e isla cu nan a experencia.
Ganador di ‘Appeltje’ Mega-D Youth Foundation
Atardi Rey lo bishita Mega-D Youth Foundation, ganador di un ‘Appeltje van Oranje’. E organisacion aki ta soru no solamente pa hobennan na Sint Eustatius haña cuminda, sino tambe e oportunidad pa desaroya nan mes. Durante programanan despues di scol, muchanan ta haña cuminda, guia cu nan tarea y actividadnan caminda hunga y siña ta bini hunto. Asina e fundacion ta stimula balornan positivo, un estilo di bida salu y educacion serca hobennan. Rey Willem-Alexander lo haña un recorido den e edificio y lo papia cu guianan y hobennan.