Den nos comunidad, e propiedad di un cas of tereno ta representa e fruto di un bida entero di trabou duro. Sinembargo, ta presenta situacionnan deplorabel unda ancianonan ta keda expuesto na presion familiar prinsipalmente yiunan of abuso di poder pa traspasa nan bienes contra nan berdadero boluntad. Frente a esaki, e pregunta ta surgi: kico ta e rol y e proteccion cu un notario mester ofrece, y kico ta e consekuencianan si e deber aki faya?
E Yiu di “Bon Boluntad” y e Malicia Scondi den e Acto
No semper e precion riba un anciano ta manifesta su mes como un peligro habri of menasa violento. Hopi biaha, e malicia ta scondi tras di un fachada di amabilidad. E yiunan ta presenta na e oficina di notario como yiu of yiu di cuido “di bon boluntad”, bisando cu nan kier yuda e mayornan “organisa cosnan pa ora cu cos bay mal bida” of “pa evita problema di herencia despues”. Nan por bisa e anciano cu ta trata di un simpel papel administrativo, of cu e tata/mama ta keda doño di e cas pa semper.
Sinembargo, ora di lesa e letra chikito di e acto notarial, e realidad ta totalmente diferente: e ta mustra un traspaso total di propiedad caminda e anciano ta keda sin ningun derecho real, of e ta otorga un poder amplio (volmacht) cu ta duna e yiu e libertad absoluto pa bende of hipoteca e cas sin cu e mayornan sa of por haci nada mas. E peligro mas grandi aki ta cu e anciano ta firma kere cu e ta proteha su mes, sin sa cu el a keda despoja di su patrimonio legalmente. E mentira falso aki ta pone e deber di e notario na un prueba indespensabel: pa mira mas aleu di e sonrisanan y e bon palabranan na mesa, y analisa e consecuencia real di e texto tecnico.
E Deber di Cuido y Investigacion Notarial (Zorgplicht en Onderzoeksplicht)
Un notario no ta simplemente un funcionario cu ta autentica un firma of duna validez na un documento. Segun e marconan legal di nos sistema di derecho, e notario tin un deber di cuido y di investigacion independiente pa sigura cu e boluntad di e persona cu ta firma ta completamente liber, consciente y sin ningun tipo di presion of engaño.
Prome cu pasa un acto cu ta envolvi e bienes di un persona di edad avansa, e notario tin e obligacion pa aplica mecanismonan di control estricto:
- Conversacion Priva y Directo: E notario mester entrevista e anciano su so, sin e presencia di yiunan, famianan of terceronan cu por tin un interes financiero. Esaki ta e momento unda e notario ta evalua si e decision ta proveni di e propio deseo di e doño di cas.
- Evaluacion di Capacidad Mental (Wilsbekwaamheid): Notario mester verifica si e persona ta den pleno uzo di su sencia mental pa compronde e alcance y e consecuencianan legal y financiero di e acto. Si tin cualkier duda cu e anciano ta sufri di deterioro cognitivo of demencia, e notario no por procede.
- Verificacion Medico Independiente: Ora tin incertidumbre riba e estado di salud mental, e notario ta obliga pa solicita un evaluacion di un profesional medico independiente (manera un geriatra of psikiatra) cu no ta e dokter di cas di e famia.
- Obligacion di Refuse (Dienstweigeringsplicht): Si e notario ta constata cu tin abuso di situacion, presion, engaño of cu e transaccion ta desproporcionadamente perhudicial pa e anciano, e notario ta obliga pa ley pa nenga su servicio y no pasa e acto.
Consecuencianan Legal y Disciplinario pa e Notario
Si un notario faya den su deber di investigacion y pasa un acto unda a tuma luga abuso di un anciano, e legislacion ta stipula responsabilidadnan severo pa e notario mes:
- Procedimiento Disciplinario (Tuchtrecht): E anciano of e partidonan afecta por presenta un keho oficial na e Hunta di Supervision (Kamer van Toezicht). Si determina negligencia, e notario por enfrenta sancionan cu ta varia di un amonestacion of suspension, te cu e retiro definitivo di su funcion (ontzetting uit het ambt).
- Responsabilidad Sivil (Civil Liability): E notario por wordo demanda den corte pa daño y perhuisio (onrechtmatige daad). Si e anciano perde su cas of patrimonio pa motibo di e falta di cuido di e notario, e notario (o su seguro di responsabilidad profesional) por wordo condena pa compensa e balor financiero completo.
- Prosecucion Penal (Strafrecht): Den casonan extremo unda e notario tabata na altura di e malicia of fraude y a coopera consciente cu e traspaso ilegal, esaki ta constitui un delito penal (falsificacion di documento of complicidad den estafa), cual por tin castigo di prizon.
PuntonanlLegal ora un Acto a Pasa bou di Presion
Den e caso lamentabel cu un acto notarial a logra pasa door di manipulacion of presion di yiu of familiar, e via legal no ta keda cera. Por inicia un demanda den corte sivil (Gerecht in Eerste Aanleg) pa pidi anulacion di e acto (vernietiging van de akte) a base di abuso di situacion (misbruik van omstandigheden), menasa, engaño, of falta di capacidad mental na e momento di e firma.
E proteccion di nos ancianonan ta rekeri no solamente e vigilancia di e sistema legal y notarial, sino tambe e conscientisacion di nos comunidad pa denuncia cualkier intento di abuso financiero contra nos adultonan mayor.
Lamentablemente cu casonan asina ta pasando na Aruba y e anciano ta haya su mes ta saca hopi placa pa bay corte pa proba haya su cas bek na momento cu yiunan ta scoge pa haci danjo na nan propio mama. Un alerta na notarionan cu ta contrbui cu e paso nan aki sin tuma precaucion na momento cu un anciano tin un edad respeta y no ta haci e investigacionnan necesario prome cu pasa un acto.