Den cuadro di e esfuersonan continuo pa fortalece e diferente institucionnan
responsabel pa siguridad di Aruba, dialuna atardi a duna inicio oficialmente na un
formacion pa Buitengewoon Opsporingsambtenaar (BOA). Un total di diestres duanero
y 1 recherche di Landsrecherche a cuminsa cu e opleiding, cu lo tin un duracion di
aproximadamente seis te shete luna.
Minister di Husticia, Integracion, Transporte Publico y Energia, mr. drs. Arthur Dowers,
ta considera e formacion aki un paso importante den e proceso di profesionalisacion y
fortalecemento di e capacidad operacional di institucionnan cu tin un rol esencial den
cumplimento di ley y proteccion di nos estado di derecho.
E opleiding BOA ta enfoca riba capacitacion di profesionalnan cu, den ehecucion di nan
funcion, mester dispone di e conocemento huridico, abilidadnan practico y preparacion
necesario pa eherce tareanan di investigacion y opsporing den e cuadro di nan
competencia legal.
Fortalecemento di siguridad no ta limita solamente na ampliacion di personal of
adkisicion di material di trabao, sino tambe na capacitacion continuo y desaroyo
profesional di esnan cu diariamente ta encarga cu cumplimento di ley.
Gobierno mester sigura cu e profesionalnan den nos institucionnan ta dispone di e
preparacion y hermentnan necesario pa eherce nan trabao. Capacitacion no ta un
gasto, sino un inversion directo den calidad, integridad y efectividad di e institucionnan
aki.
Durante e siguiente lunanan, e 14 participantenan lo dedica nan mes na e proceso di
formacion, cu e meta di adkiri e conocemento y competencianan necesario pa cualifica
como BOA.
Minister Dowers ta felicita e participantenan pa e paso importante aki den nan desaroyo
profesional y ta desea nan hopi exito durante e formacion.
