Dia 29 di sèptèmber 2022 Tourism Corporation Bonaire (TCB) a bishitá diferente skol básiko na nos isla pa hasi entrega di e buki di turismo nobo titulá ‘Turismo na Boneiru, mi Kultura, mi Enkanto!’ pa nos alumnonan di grupo 5 te ku grupo 8.
Esaki ta e di kuater edishon di e buki di turismo ‘Turismo na Boneiru’ ku TCB a produsí den kolaborashon ku SKAL i ku e eskritor lokal Denise de Jongh-Rekwest a skirbi. Enseñansa ta esensial i pa e motibu akí TCB ke sigui invertí den nos kuríkulo di skol pa medio di ofresé buki i material di lesa tokante turismo.
Direktor di TCB Miles Mercera, diputado di turismo Hennyson Thielman i diputado di Kultura Pablo ‘James’ Kroon, huntu ku Miss Turismo Boneiru Sunniva Manuel a entregá e promé ehemplarnan na e diferente direktornan di nos skolnan básiko.
E buki akí ta un instrumento fantástiko pa nos hóbennan siña mas tokante nos turismo, nos patrimonio lokal i nos kultura. Nos ta deseá nos muchanan hopi plaser ku lesamentu di e buki akí!
