A kima tur droga ku haya riba boto interseptá ku droga

Riba djaweps 29 di yüni, e barku di Marina Hulandes i Wardakosta Karibe Hulandes a interseptá un boto den laman Karibe ku tabata transportá probablemente paketenan di droga. Kuerpo Polisial Hulanda Karibense ku sosten di Koninklijke Marechaussee (KMar), alrededor di 5 or di atardi a tuma over e sinku sospechosonan i e supstansianan probablemente narkótiko for di Wardakosta riba waf Chicu Mercelina na Kralendijk.

KPCN mesora a kuminsá ku un investigashon i a konfirmá ku en bèrdat tabata trata di supstansianan narkótiko. A konfiská un kantidat di 601.5 kilokilo di kokaina ku inmediatamente a keda destruí. E sinku sospechosonan, prosedente di Latinoamérika, a keda detené en konekshon ku e kaso aki. Ta trata di un hòmber di inisial J.J.A.O. di 32 aña di edat, un hòmber di inisial D.M.V. tambe di 32 aña di edat, un hòmber di inisial J.D.P.G. di 48 aña di edat, un hòmber di inisial D.M.V. di 36 aña di edat i un hòmber di inisial B.A.N.O. di 40 aña di edat. Investigashon den e kaso ta andando.