A stipula presupuesto pa inversion den ekipo di Guarda Costa Caribe cu e plan di termino Largo 2019-2028

Ta garantisa cu den e añanan venidero por haci uzo di Guarda Costa Area Caribense. Guarda Costa Area Caribense ta dispone te cu 2028 di en total € 168 miyon, destina pa reemplaso di ekipo. E cuater Paisnan den Reino ta percura conhuntamente pa cubri e presupuesto financieramente. Esey tin para den e Acuerdonan di gobernacion, cu a keda trata awe den Conseho di Minister di Reino hunto cu e Plan di Termino Largo (LTP) 2019-2028 di Guarda Costa Carib. Minister Ank Bijleveld-Schouten (Defensa) a entrega e documentonan awe na parlamento Hulandes.

Guarda Costa Carib ta existi desde 1996. E ta un acuerdo di cooperacion entre tur e paisnan den Reino. Hulanda (69%), Aruba (11%), Corsou (16%) y Sint Maarten (4%) ta aporta proporcionalmente den e gastonan. E contribucion di Hulanda ta procedente di e presupuesto di Defensa.

Por yama e acuerdo di cooperacion sin mas exitoso. Como agente di ley maritimo, Guarda Costa Carib ta prueba su mes un conexion indispensabel den e parti Caribense di Reino.

Guarda Costa no ta enfoca solamente riba vigilancia di e fronteranan maritimo exterior. E organisacion ta hunga un papel importante tambe den combatimento di crimen cu ta crusa frontera y tin tareanan riba tereno di supervision, search and rescue y combatimento di desaster.

Pa por ehecuta e tareanan aki bon e añanan venidero tambe, mester reemplasa e ekiponan periodicamente. Cu e LTP, Defensa ta duna un bista den esaki. Di e 168 miyon, 159,9 miyon ta bay pa inversionnan relaciona cu reemplaso di ekipo. E montante cu resta ta pa gastonan di explotacion.

Defensa, como administrado di Guarda Costa Carib, ta haya esencial cu desplega operacional di Guarda Costa Carib ta keda garantisa. Sigur den e epoca actual, den cua narcocriminalidad y clima extremo ta aumentando. Banda di esey e region tin di haber cu un Venezuela instabil, contrabanda di hende y problematica di migracion.