Durante e prome TYR Giants Open exitoso e fin di siman tras di lomba, por a conta cu dos maestro di ceremonia (MC), cu a haci un trabou impresionante y diferente na loke e mundo di natacion sa custuma cu ne. Hopi tabata e comentarionan positivo riba e manera innovativo pa Aruba, con e dos MC-nan a dirigi e Campeonato y apoya e landadonan cu hopi animo.
Riba peticion di e miembronan di Giants Aquatics Aruba, diahuebs anochi e famia di Giants Aquatics Aruba a bin hunto pa asina firma un MOU cu sr. Addonsito Croes y sra. Tiziana La Torre. Ta trata di un MOU den cual tur dos persona a firma pa fungi como MC na tur evento di Giants Aquatics Aruba y sigur na e TYR Giants Open. Ambos lo fungi como MC exclusivamente pa Giants Aquatics Aruba den e mundo di natacion. E miembronan presente a firma como testigo di e gran acontecimento aki. Cu e paso aki, Giants Aquatics Aruba ta sigui introduci cambionan na bienestar di mundo di natacion na Aruba, adema di sigura otro exitoso TYR Giants Open.
Giants Aquatics Aruba ta gradici y yama bon bini un biaha mas na tanto Tiziana La Torre como Addonsito Croes na e gran famia di Giants Aquatics Aruba.
