Aruba Hotel & Tourism Association (AHATA) tur luna ta acumula e cifranan di ocupacion y prijs di hotelnan. Den e cifranan di Mei, Presidente y CEO di AHATA, Tisa LaSorte, ta nota algun desaroyo importante cu ta rekeri atencion.
Pa motibo di e introduccion di camber di hotel nobo di calidad y balor halto e aña aki, e inventario a crece na Aruba. Sinembargo, e cantidad di estadia di turista cu a keda na hotel no a crece na mesun proporcion. E resultado ta cu, maske e prijs averahe pa camber (ADR) a keda halto, e averahe di ocupacion di camber a baha, yegando na 71% na Mei, compara cu 81% na Mei 2024.
Na Mei, e entrada averahe pa camber disponibel (RevPAR) di $248 ta 1% menos cu e aña anterior. AHATA ta sigui monitorea esaki di cerca, ya cu e entrada di hotelnan ta un pilar esencial pa trabou, inversion y oportunidadnan economico den henter e sector turistico di Aruba.
Ademas, un rebaho den interes pa biaha for di Merca relaciona cu e situacion comercial, ta afectando e proyeccion di ocupacion. E proyeccion original di 81% pa henter aña 2025 a wordo ahusta na 76%, cu un nota di mas cautela pa e di 3 y 4 kwartaal di e aña aki. Gastonan di empresa a subi den ultimo añanan, locual ta subraya e importancia di mantene un RevPAR saludabel.
Kico e cifranan aki ta nifica pa e comunidad? E exito di nos sector turistico ta traduci su mes directamente den seguridad economico pa hopi famia Arubano, y ta contribui na fondonan esencial pa servicionan publico y sosten pa negoshinan local. Ta pesey, AHATA ta keda atento na e desaroyonan aki, trahando pa sigura un sector turistico resiliente cu ta sigui genera prosperidad y oportunidadnan pa un Aruba den su totalidad.
