Dia 30 di novèmber 2023 i evento tan sperá di Tourism Innovation Project Shark Tank a tuma lugá na Delfins Beach Resort. Nuebe kandidato pashoná a haña oportunidat pa mustra nan proyekto inovativo i nan tabatin chèns di gana un premio mayó di $ 10.000.
Durante e Tourism Innovation Project ku a keda lansá na luna di ougùstus via un kolaborashon ku Kámara di Komèrsio, e partisipantenan por a presentá nan ideanan úniko i progresivo pa kontribuí na e produkto turístiko di Boneiru i mehorá esaki.
Nuebe kandidato a pone nan stèmpel riba e evento, kaminda kada un a aportá na e ambiente vibrante di e Tourism Innovation Project. E kandidatonan akí tabata Anthony Angila, Wijnand de Wolf, Javier Semeleer, Xiomara Frans-Muller, Saeed Lourens, Flavio Maestroni, Manon Meijer i Sharnise Alexander. E kompetensia tabata fuerte i kada presentashon tabata yen di inovashon, pashon i kreatividat.
Despues di un evaluashon e hurado a identifiká tres proyekto eksepshonal ku a destaká entre e otronan. E tòp tres finalistanan di e Tourism Innovation Shark Tank ta:
Jose i Vanessa Martis ku nan proyekto ‘Glamping’.
Saeed Lourens ku su konsepto di ‘Nature Cooking’.
Anthony Angila ku su proyekto ‘Kunuku Life’.
Nos apresio ta bai pa e hurado i nos partnernan apresiá. Nan sosten a hunga un ròl krusial pa hasi e evento akí posibel. Miles Mercera (TCB), Paul Coolen (Sapias Holding), Benita Wout (MCB), Maarten van der Scheer (BIA), Veroesjka de Windt (BONHATA), Gunther Flanegin (Kapitan di Haf di Entidat Públiko Boneiru) i Phar Martha (Kámara di Komèrsio) a forma parti di e hurado.
Anthony Angila a bini dilanti komo e ganadó final ku su proyekto di ‘Kunuku Life’. Anthony su vishon ta pa kompartí e bunitesa di i e amor pa e ‘Bida di Kunuku’ ku tantu nos bishitantenan komo nos poblashon lokal, i su plan ta tambe pa invertí den un eksperensia ‘zipline’ úniko na kunuku di su famia, di manera ku e ta añadí un atrakshon úniko i eksitante na nos isla.
E Tourism Innovation Project a mustra su kompromiso ku stimulashon di inovashon, kolaborashon i oportunidat den sektor turístiko. Nos ta felisitá tur partisipante i nos ta anhelá pa mira kon e proyekto ‘Kunuku Life’ di Anthony Angila ta kontribuí na e desaroyo kontinuo di nos sektor turístiko.
