Na luna di december 2022, ministerio di desaroyo economico (meo) hunto cu minister ruisandro cijntje a anuncia e decision pa temporalmente reintroduci e areglo di macutu basico 2012. Esaki a sosode, como parti di esfuersonan pa, conhuntamente cu partidonan den e cadena di supermercado y minimarketnan, yega na un sistema cu tur persona den nos comunidad por tin acceso liber i husto na comestibel y productonan vital.
Mirando ku combersacionnan ainda ta tumando luga riba e eficiencia i eficacia di e macutu basico i e posibilidatnan pa eventual alternativanan, meo huntu ku partidonan enkuestion a yega na e decision pa bolbe prolonga e areglo di macutu basico 2012 cu un (1) aña.
Despues di a reintroduci e areglo di macutu basico 2012 na luna di december aña pasa, minister cijntje a institui un ‘task force’ encarga pa haci un investigacion ku lo mester a conclui si acaso e areglo di macutu basico manera e ta actualmente ta efectivo suficiente of si mester bini adaptacionnan den esaki òf kisas completamente un otro alternativa. A base di e conclusionnan di e ‘task force’, partidonan ya a sinta na mesa i practicamente ta yegando na un palabracion concreto con ta bay sigui. Esaki ta nifica, cu si acaso logra concretisa konklushonnan di e ‘task force’ prome ku e periodo di un (1) aña pasa, meo i minister cijntje lo anuncia posibel cambionan di e areglo mas prome.
E areglo ministerial den cua a reintroduci macutu basico 2012, ta inclui entre otro productonan manera aros, lechi, pan y algun fruta i berdura. E areglo den su totalidad ta disponibel riba wèpsait di gobièrnu.cw pa un y tur cu ke tuma nota di dje.
