Un artista ku un historia úniko ta Salustiano Martha. E artista di 71 aña ta yen di idea pa saka su bario di Seru Fortuna pa dilanti. Esaki e ta hasi pa medio di su hardin di obra (beeldentuin), kaminda e ta hasi uso di temanan manera unidat, e komunidat multikultural i su roots Afro-Karibense.
Ora Selsio, manera e ta wòrdu yamá, tabatin 26 aña e la emigrá pa Hulanda, kaminda pa hopi aña e la traha komo artista. Desde 2021 e ta biba i traha parsialmente na su pais natal, Kòrsou. Su ideal ta pa forma un komunidat na Seru Fortuna, kaminda abitantenan ta sostené otro pa medio di agrikultura i otro produkto ku nan mes a traha, destiná pa benta. Representante di Hulanda, Erwin Arkenbout a bishitá e hardin di obra na Seru Fortunaweg kaminda e la haña un rekorido di Selsio i Lusette Verboom di Gallery Alma Blou.
Interesadonan por bishitá e hardin di obra riba djárason i djasabra di 10.00 pa 14.00 or na Seru Fortunaweg 190, kaminda Selsio a nase.
