ORANJESTAD, Aruba
Parlamentario Endy Croes ta lamenta cu ultimo siman(nan) ta atendiendo cu un problema interno di un partido den Coalicion cu no a logra resolve nan problema cu un Minister. Banda di esaki lokual ta mucho mas importante ta e problemanan riba nivel di Pais cu mester di atencion, concentracion, conseho pa hunto nos jega na e mihor solucion posibel pa cu Hulanda. Nos un grupo grandi cu a perde trabou y hendenan sin entrada cu mester wordo juda tur luna pa pasa door di e crisis aki y pa esey Aruba mester logra financiamento pa por cumpli cu e proposito. Nos pueblo no por sufri di hamber.
/// Hulanda precionando pa introduci Caribiesche Hervormings Entiteit:
Mientras e enfoke actualmente ta riba un problema sea personal of di partido den Coalision, Hulanda ta probechando y ganando tempo pa sigui pensa y adelanta den nan compromiso pa sea como sea logra pusha e Caribische Hervormings Entiteit aki mediante un of otro tipo di Rijkswet. Pesey ta hopi importante pa restablese ordo unda por duna gobierno mediante nos Promer Minister e espacio y e klima perfecto pa sigui negosha pa nos por purba jega na algo promer cu e proximo Rijks Ministerraad 14 di Augustus binidero. Importante pa Gobierno, Parlamento, Gremio, Sindicatonan y tur hende ta uni pa Aruba por sali beneficioso den e proceso aki importante aki.
/// Algemeen Belang, Partij Belang, Persoonlijk Belang:
Den politica tin algun liña hopi importante cu un politico tin di sigui. Unaves Bo escohe pa subi un lista politico Bo sa cu Bo bida lo cambia. Bo ta bira un figura publico y tur hende lo buska tur historia di Bo y hasi nan publico. Aunke Bo proposito ta pa sirbi Bo pais y trata di hasi lo corecto pa juda Bo pueblo progresa esaki no lo bay sin critica cual hopi biaha por ta infunda. Si Bo no hari cu un hende nan ta rabia cu Bo, si Bo a lubida di duna un hende un shakehand ( promer cu Covid 19) nan ta bisa Bo a haña idea y asina por sigui jena e lista aki. Como Politico e promer liña cu Bo ta sirbi ta e Algemeen Belang pues Interes General di Bo pais. Na di dos lugar bo ta sirbi Partij Belang pues Interes di Bo Partido cual ta e vehiculo cu Bo a usa y a hiba bo na cualkier posicion. E di tres interes ta Persoonlijk Belang pues Interes Personal. Como Politico momento Bo ta tuma un desicion semper Bo ta usa e volgorde aki. Pueblo-Partido-Persona. Importante pa siñala cu Aruba ta den un Crisis Financiero door di Covid 19 nunka bisto. Pa logra sali afor mester tin primordialmente trankilidad curashi y tur nanishi mester ta den mesun direcion. Pues desicion cu lo mester wordo tuma actualmente mester sirbi e Interes General. Problemanan den un partido of cu un of mas persona no por stroba of stagna un Gobernacion y un pais cu ta bringando pa sali for di Crisis. Nos ta pidi tur inteligencia di mundo pa nos Gobernantenan y alaves e tarea duro cu Parlamento tin den su man pa tuma e desicionnan corecto na Bienestar General di Pais Aruba.