Historiado di arte y gestor cultural local Ana Maria Hernandez a wordo invita pa participa den un residencia curatorial di 3 luna na Villa Sträuli, situa na Winterthur, Suisa. Hernandez a wordo selecciona door di e proyectonan ela desaroya pa e comunidad Arubano den e ultimo 4 aña cu su fundacion di educacion artistico, Plataforma Aruba. E biahe a wordo realisa cu e sosten di Prins Bernhard Cultuurfonds Caribisch Gebied.
Programanan di residencia artistico ta brinda profesionalnan e oportunidad di enfoca nan mes riba nan trabao den un contexto cu ta yuda nan expande nan practica profesional y asina contribui na e desaroyo profesional di e participante, como tambe na esun di nan sector cultural. E ta yuda e desaroyo di un “netwerk” profesional, cultiva colaboracionnan internacional y ofrece un intercambio di perspectivanan.
Villa Stäruli ta un institucion cu ta enfoca riba e intercambio y colaboracion artistico interdisciplinario entre profesionalnan internacional. Durante e lunanan di januari te april di 2023, Hernandez a haci diferente “studio visits” na artistanan na Suisa, a conoce e institutonan local y conecta cu profesionalnan internacional. Tambe tabata tin e oportunidad di comparti e practicanan artistico di Aruba den diferente presentacion y meetings. Durante un Open Studio, Hernandez a presenta e proyecto di Fundacion Rancho y Plataforma Aruba titula Oda Na e Piscador den e instituto. E presentacion tabata acompaña pa un exhibicion “pop-up” di e proyecto presentando e obranan di Samuel Sarmiento.
Ana Maria Hernandez tin un M.A den Arte Visual Contemporaneo for di Universidad di Amsterdam y ta e fundador di Plataforma Aruba, un institucion local di educacion artistico. Hernandez tambe tabata encarga di e programa AUA Exhibits 21-22 na Cas di Cultura, unda 8 artista visual local a presenta nan trabao den un serie di 5 exhibicion. Actualmente, e ta e curador y desaroyado di proyecto di “Oda na E Piscador.” Esaki ta un proyecto di Fundacion Rancho y Plataforma Aruba den colaboracion cu artista local Samuel Sarmiento. “Oda na E Piscador” ta forma parti di e programa di Fundacion Rancho celebrando Oranjestad su 200 aña.
