Boneiru, representá pa Tourism Corporation Bonaire (TCB) i Grand Windsock Bonaire, a tuma parti den Vakantie Expo (feria) na Antwerpen, Bèlgika, for di 26 te ku 28 di yanüari 2024.
E tim di TCB, ku ta inkluí Marjolein Oleana – Business Manager & Europe Liaison, Annette Emerenciana – Marketing PR & Project Coordinator, i Sander Winterberg – General Manager di Grand Windsock Bonaire, tabata kla pa yama e bishitantenan bon biní.
Vakantie Expo Antwerpen a atraé un total di 20.000 bishitante. Na e stènt di Boneiru, TCB a ofresé informashon tokante e isla i bishitantenan por a saboriá di Ròm Rincón i likor di Kadushi.
Ku e partisipashon na e feria, TCB ta spera di reforsá ainda mas su posishon den e merkado Bèlgikano. Durante e feria, TCB a hiba kòmbersashonnan ku diferente operadónan di biahe i turismo, ku meta pa inkluí Boneiru den nan oferta di biahe.
Partisipashon na Vakantie Expo a duna TCB un oportunidat ekselente pa presentá Boneiru na bishitantenan di e feria i eksplorá oportunidatnan nobo den kolaborashon ku operadónan di biahe Bèlgikano. Ku énfasis pa aumentá e visibilidat, Boneiru ta spera di logra krese mas ainda den e merkado Bèlgikano.
TCB huntu ku 11 otro partner lo ta presente na e feria Duikvaker ku ta tuma lugá riba 3 i 4 di febrüari 2024, na Houten.
