E siman akí Maurice Adriaens, hefe di departamento di Agrikultura, Krio di Bestia i Piskamentu (LVV) di Entidat Públiko Boneiru, i Nolly Oleana, presidente di Mesa di Klima, a representá Boneiru na e Caribbean Climate and Energy Conference 2025 (CCEC25) na Kòrsou. E konferensia a trese representantenan di e islanan karibense huntu pa konhuntamente traha riba solushon pa e desafionan di klima i energia ku ta oumentando den nos region.
Durante e konferensia vários tema urgente a bini dilanti. E partisipantenan a boga fuertemente pa partisipashon struktural di hóbennan den toma di desishon tokante klima, un mihó preparashon pa kalamidat i un enfoke mas grandi riba siguridat di energia via fuentenan sostenibel, manera solo i bientu. Disponibilidat di awa pagabel tambe nan a menshoná komo un nesesidat apsoluto.
Un punto problemátiko importante ku ta eksistí na kasi tur e islanan, ta e falta di sufisiente legislashon i regulashon rònt di klima i energia. Banda di esaki nan a suprayá importansia di integrashon di kambio di klima den kuríkulo di enseñansa, di manera ku hóbennan for di chikitu ta bira konsiente di e desafionan í e solushonnan.
Aparte di energia i awa, siguridat di kuminda tambe a bini enfátikamente dilanti.
‘Nos tin ku traha riba un sistema di kuminda robusto ku por konta ku sosten lokal’, segun Maurice Adriaens, hefe di e departamento di Agrikultura, Krio di Bestia i Piskamentu di Entidat Públiko Boneiru. ‘Siguridat di kuminda ta direktamente konektá ku kambio di klima i pa e motibu akí e meresé mas prioridat riba e agènda karibense.’
Pa realisá kambionan sostenibel, un sistema fuerte di implementashon i monitoreo kontinuo ta indispensabel. Banda di esaki e falta di medionan finansiero i forsa laboral kualifiká ta keda un reto grandi. Pa e motibu akí tambe e konferensia a aksentuá e importansia di kolaborashon regional, kompartimentu di konosementu i desaroyo di proyektonan ku ta sinkronisá ku e nesesidatnan spesífiko di kada isla.
‘Ta di importansia krusial pa nos komo e diferente islanan traha huntu i sigui kompartí konosementu’, asina Nolly Oleana a enfatisá. ‘Nos no mester warda te ora solushonnan bini di pafó, pero nos mester traha pa logra resiliensia lokal ku nos propio hendenan.’
Finansiamentu di proyektonan di klima tambe a bini ampliamente dilanti. E organisashon CFAN (Caribbean Facilities for Adaptation and Nature) ta ofresé sosten na e islanan pa medio di temporalmente proveé ekspertonan pa preparashon i ehekushon di proyektonan mas grandi. Un kondishon ta sí ku ta salbaguardiá e konosementu lokalmente. Mas informashon tokante esaki ta disponibel riba www.cfan.global.
