Boneiru ta haña 13 mion euro for di e di seis i último pago di Regio Deal di Ministerio
di Bibienda Públiko i Ordenansa Teritorial. A tuma e desishon akí durante e reunion di konseho di
minister riba djabièrnè 31 di yanüari 2025. E kontribushon finansiero di Reino ta sostené
realisashon di ambishonnan importante for di e Programa di Gobernashon ‘E diferensia – hustu i
duradero’ (òktober 2023 – mart 2027) i e Akuerdo Intergubernamental Boneiru i Reino 2024 –
2027.
Sentro Multifunshonal
E tema konektividat ta pará sentral. Ta trahando riba un sentro multifunshonal pa eventonan
kultural, sosial i ekonómiko. E sentro akí ta fortifiká Boneiru su identidat kultural i ta hasi posibel pa
organisá eventonan más grandi (inter)nashonal tambe.
Banda di esaki ta mehorá e ubikashon sentral di e área di Mentor. E plannan ta enfoká riba:
Mehorashon di e kamindanan di konekshon entre Rincon i Playa.
Realisahon di un maneho duradero di awa den e área akí.
Mihó skol i mihó transporte públiko
E tema – alkansabel ta haña atenshon pa medio di hasi nos skolnan más funshonal, más
alkansabel i más aksesibel. Pa esaki:
Ta konstruí kaminda pa i for di e skolnan (inkluso kaminda pa baiskel i kaminda pa kana).
Ta organisá sitionan pa ‘kiss-and-ride’, lugá pa stashoná outo i plenchi ku vegetashon rònt
di nos skolnan.
Tambe ta bin transporte públiko pagabel i bon organisá. Di e manera ei tur hende den un forma
simpel por move di un lugá pa otro i fasilidatnan importante manera kuido, nos skolnan, nos
barionan, tiendanan i kompanianan ta bira mihó alkansabel.
Logístika i energia sostenibel
Ta stimulá e tema outosufisiensia pa medio di:
Konstrukshon di un lugá pa almasená kònteiner pegá ku haf i mehorashon di e proseso
logístiko rònt di suministro di merkansia. Esaki ta promové alkansabilidat, e ta oumentá
siguridat di tráfiko i e ta redusí molèster di transporte den haf. Alabes e gastunan di
transporte ta baha pa suidadanonan i empresarionan.
Instalashon di panel solar na e skolnan básiko supsidiá. Esaki ta pone ku e gastunan di
energia di e skolnan ta baha i por usa loke a spar riba e gastunan akí pa sigui mehorá nos
enseñansa. Ta pone e sobreprodukshon di energia bèrdè na e skolnan gratuitamente na
disposishon di nos Kompania di Awa i Koriente Boneiru (WEB) ku komo meta pa baha e
gastunan di koriente pa suidadanonan i empresarionan.
Un bista padilanti
Boneiru i Reino ta bai sigui elaborá e proposishonnan den algun konbenio, ku probablemente nan
ta bai firma meimei di aña 2025. Ku e inisiativanan akí Boneiru ta traha riba un futuro ku mas
prosperidat, miho alkansabilidat i un ambiente di biba mas sostenibel.
