Bureau Sostenemi a celebra dos decada di dedicacion na e proteccion di
muchanan y sosten na famianan den nos comunidad. Como parti di e aniversario aki, e
organisacion a inaugura nan oficina nobo, situa na un ubicacion mas central cu ta facilita un
acceso mas visibel pa esnan cu tin mester di guia y ayudo.
Minister Wyatt-Ras hunto cu Directora sra. Magaly Maduro a corta e cinta, marcando e apertura
oficial di e oficina nobo. Durante e ceremonia, tabata tin un momento simbolico hunto cu
muchanan y cantante Freddy Rasta, reflehando e mision central di e instancia: proteha, guia y
sostene. E evento a reuni representantenan di gobierno, profesionalnan y partnernan di
comunidad.
Bureau Sostenemi ta fungi como e punto central pa conseho y orientacion ora tin preocupacion
tocante bienestar di un mucha. Ciudadanonan por acudi pa ricibi e guia profesional necesario y
reporta situacionnan cu por pone seguridad di un mucha na riesgo.
Segun Minister Wyatt-Ras, kende tin un trayectoria largo den e area social y cu a sigui di cerca e
desaroyo di e tema aki, e trabou di Bureau Sostenemi ta toca hende directamente:
“Mi mes a traha den e sector social y mi sa con esencial e ta pa tin un luga digno unda
ciudadano por acudi ora tin preocupacion tocante un mucha. Bureau Sostenemi tin un rol
fundamental den e red di proteccion y e trabou aki merece nos sosten continuo,” e minister
a expresa.
Relaciona cu e luna di conscientisacion y prevencion di maltrato di mucha, e apertura aki ta
resalta e compromiso di e Ministerio di Salubridad, Asunto Social, Cuido di Adulto Mayor y
Maneho di Adiccion pa fortalece e sosten necesario den comunidad. E sede nobo ta un herment
vital pa sigura cu e proteccion di nos muchanan ta keda un prioridad y un responsabilidad cu nos
tur ta comparti.
