Riba Dianan 22 te ku 24 di mart, mundu kompletu lo bini huntu na New York durante selebrashon di Dia Internashonal di Awa. Esaki ta tuma lugá na e Konferensia Mundial di Awa di Nashonnan Uni (UN 2023 Water Conference). Reino Hulandes huntu ku Repúblika di Tadjikistan ta ko-organisadó di e konferensia aki.
E ophetivo di e konferensia akí ta, pa yega na implementashon aselerá i di mas impakto pa por atendé ku e desafionan riba tereno di awa i adaptashon klimátiko. E konferensia akí ta úniko debí ku ta 50 aña pasá ku un konferensia riba e tópiko aki a keda organisá pa promé biaha pa Nashonnan Uní.
E 5 temanan di e konferensia mundial di awa lo ta:
- Awa pa salú: akseso sigur na awa potabel, higiena, i instalashonnan sanitario.
- Awa pa desaroyo: balorashon di awa, maneho di interesnan den awa, energia, kuminda, i naturalesa, ekonomia duradero i desaroyo urbano.
- Awa pa klima, resiliensia i naturalesa: biodiversidat, klima, resiliensia, i maneho di desaster.
- Awa pa kolaborashon: kolaborashon internashonal i ku ta krusa frontera den awa, kolaborashon pa logra e Agènda di Desaroyo 2030.
- Dékada di akshon pa awa: aselerá i implementá e ophetivonan di e dékada pa medio di un plan di akshon di e sekretario general di Nashonnan Uni.
Banda di e konferensia akí, lo tin diferente asina yamá ‘side-events’ ku por keda organisá pa partisipantenan di e konferensia. Komo parti di Reino Hulandes, Kòrsou tambe lo partisipá aktivamente den e konferensia Mundial di Awa akí, i ta kordiná i organisá un asina yamá ‘side-event’ durante di e siman. E evento akí lo ta unu spesialmente pa islanan den tur parti di mundu, i ta keda organisá na e sede di Nashonnan Uní. E evento ta konta ku partnernan manera Global Water Partnership-Caribbean, Local 2030 Islands Network, Global Island Partnership, i Pacific Community. International Panel for Delta’s and Coastal Areas, Caribbean Climate Smart Accelerator, i islanan hermano di Reino Hulandes, i Grenada, Belize, Samoa i Nueva Caledonia tambe lo partisipá. Su mahestat, Rei Willem-Alexander tambe lo ta presente durante di e evento aki.
Kòrsou a kuminsá traha riba su maneho di awa na 2016 ku instalashon di e Komishon pa Maneho di Awa Integral dia 22 di mart 2016, pues 7 aña pasá. Pa medio di e indikadónan di e metanan pa desaroyo sostenibel, esta e SDG 6 ku ta trata awa, a hasi un análisis profundo di e estado di awa aki na Kòrsou. Ministerio di VVRP pa medio di DOW i METEO, GMN, MEO, Aqualectra i Fundashon Tas ta forma parti di e Komishon pa Maneho di Awa Integral.
Abase di esaki a tene konsulta ku diferente interesado durante entrevista, konferensia nan i seminarionan ku a keda organisá, i diferente tim di eksperto a keda konsultá riba tópikonan spesífiko. E aportenan risibí, a kontribuí pa traha un plan di maneho pa por atendé ku tur e desafionan riba e tereno akí. E plan di maneho a keda ratifiká pa Konseho di Minister na desèmber 2022. Ku e plan akí, Kòrsou tin un maneho aprobá i por move pa e siguiente parti ku ta ehekushon.
Durante di e konferensia mundial di awa, Kòrsou lo partisipá ku 3 delegado, Sr. Albert Martis, Segundo Vise-presidente di World Meteorological Organzation (WMO) i Direktor di Servisio Meteorológiko di Kòrsou, Sra Vanessa Toré, Direktora di Koperashon Ekonómiko Internashonal na Ministerio di Desaroyo Ekonómiko (MEO) i alabes Presidente di e Komishon di Awa di Kòrsou, i Sra. Pédzi Flores-Girigori, Hefe di Operashon na Servisio Meteorologiko Kòrsou i Sekretario di Komishon di Awa di Kòrsou.
Na New York, Kòrsou lo demostrá su logro riba tereno i lo buska partnernan pa por fasilitá i apoyá implementashon di nos maneho di awa, pa asina yega na “Awa pa tur” aki na Kòrsou.
Tambe e otro islanan den Karibe a parisipa unda ku Minister Doran di St Maarten, Gezaghebber Rijna di Boneiro y Hefe di Meteo Martis di korsou, Minister Ursell Arends di Aruba y Prome minister di Aruba Evelyn Wever Croes tabata presente,kada un a representa un isla fuerte, pero ta sinti y ta kere ku hunto por logra mas!