Den un publicacion di Trinidad and Tobago Observer, e Prome Ministro di e isla Caribense a expresa apoyo pa e ‘ esfuerso’ anti-droga di USA. Prome Ministro Kamla Persad-Bissessar a declara su apoyo completo pa Estadonan Uni. Mientras tanto e buquenan di guera Mericano ta haci nan entrada den Laman Caribe pa enfoca riba cartelnan di droga Latino Mericano.
Den un declaracion haci ayera, un dia prome cu e yegada programa di e buquenan, Persad-Bissessar a bisa cu su gobierno no tin ningun duda pa bini cu asistencia Mericano pa combati trafico di dròga. “Trinidad i Tobago ta hogando den sanger y violencia pa ultimo 20 añanan; Vice-Presidente JD Vance a papia e berdad ora el a menciona nos tasa nan halto di asesinato y criminalidad. P’esei, ningun cantidad di rabia di síndrome ‘Trump derangement’y propaganda anti-mericano lo preveni mi gobierno di bini cu asistencia pa combati e cartelnan terorista di droga,” el a declara.
E declaracion ta un contraste fuerte cu comentarionan riba e tema di Minister di Asunto Exterior y CARICOM Sean Sobers, kende a bisa diabierna cu e pais lo tene afro di e impasse actual entre Estadonan Uniyi Venezuela. Den 1 dia e declaracionnan a cambia. E Prome Ministro a señala cu gobierno lo no consulta cu CARICOM riba e tema, agregando cu cada estado miembro por papia pa nan mes. El a desestimá tambe sugerencianan cu e pais a ser presiona pa permiti e despliegue. “Ningun peticion a ser haci nunca cu e Gobierno Mericano pa nan activo militar pa accesá territorio Trinitario pa cualkier accion militar en contra di e regimen Venezolano,” Persad- Bissessar a sigura.
El a enfatisa cu ta mantene bon relacion cu e pueblo Venezolano, pero a afirma cu e pais lo permiti acceso Mericano si necesario pa defende territorio Guyanes den caso di un ataque di e regimen Maduro, ariba e teritorio Esequibo. “E unico personanan cu mester ta preocupa pa e actividad di e militar Mericano ta esunnan involucra den, o facilitando, actividad criminal. Ciudadanonan cu ta cumpli cu e lei no tin nada pa tene miedo,” el a agrega.
Persad-Bissessar a resaltá e peliger di crimen transnacional den Laman Caribe, señalando cu e paisnan chikito, no tin e recursonan pa enfrenta cartelnan grandi di droga na un manera independiente. “Debi na trafico di droga, humano y arma dicandela, paisnan Caribeño, en particular Trinidad y Tobago, a experimenta aumentonan masivo den criminalidad, actividad di gang, asesinatonan, violencia i crimen financiero,” el a declara.
l a agrega cu rednan criminal a infiltra nivelnan alto di sociedad Caribeño, influenciando decisionnan politico, legislativo, di media, bancario, di siguridad y economico, hopi bes laga gobiernonan inefectivo pa encara actividad criminal.